Жұрт ұйқыда жатқанда ел шетін кірпік қақпай күзететін шегарашылардың еңбегі ерлікпен пара-пар. ҚР ҰҚК шегара қызметі Жетісу облыстық департаменті Алакөл ауданы бойынша шегара басқармасына қарасты «Үйгентас» шегара бөлімшесі ел шебін қырағы күзетіп жүрген әскери ұжым.
Капитан Ілияс Құмаров басшылық жасайтын шегара сақшылары жауынгерлік қызметте алда келеді. Темiрдей тәртiптi талап ететiн шегара шебінде өзiне жүктелген жауапты мiндеттi атқара жүрiп абырой мен беделге ие болған қызметкерлер жетерлік. Шегара шебінің тәртібін бұзған азаматтық тұлғалар дер кезінде анықталып, әкімшілік жауапкершілікке тартылады.
Мемлекеттік шегараны заңсыз бұзуға талпынған шегара бұзушылардың жолына тосқауыл бола білген жасыл күнқағарлылардың қызметіне халық риза. Жылдың төрт мезгілінде қару асынған шегара наряды биылғы жылдың басынан бастап шегара тәртібін бұзған бірнеше азаматты құрықтады.
Ел шебін күзетудегі тәжірибесі мол жетісулық шегарашылардың алдағы уақытта мол жетістікке қол жеткізетініне сенімдіміз.
Айдар ҚАЛИЕВ
