Республика көлемінде өткен «Үздік әдіскер — батальон командирі», «Үздік әдіскер — штаб бастығы», «Үздік әдіскер — батальон командирінің тәрбие және әлеуметтік-құқықтық жұмыстар жөніндегі орынбасары» байқауында «Оңтүстік» өңірлік қолбасшылықтан қатысқан үміткерлер жүлдемен оралды.
Іс-шараның мақсаты – офицерлердің командирлік дайындық деңгейін жоғарылату, батальон буынындағы әскери қызметшілердің кәсіби шеберліктерін шыңдау және озық тәжірибелерімен алмасу еді.
Үш номинация бойынша өткен сайыстың үшеуінен де оңтүстік ұландары жеңімпаз болып келді. «Үздік әдіскер — батальон командирінің тәрбие және әлеуметтік-құқықтық жұмыстар жөніндегі орынбасары» номинациясы бойынша 5547 әскери бөлімінің 2 жедел мақсаттағы батальон командирінің орынбасары қызылордалық капитан Жүрсін Қабдешұлы 1- орынды жеңіп алса, оның жерлесі «Үздік әдіскер — батальон командирі» номинациясы бойынша 5547 әскери бөлімінің 1 жедел мақсаттағы батальон командирі подполковник Жомарт Жұмаділдаев және «Үздік әдіскер — штаб бастығы» номинациясы бойынша 5514 әскери бөлімінің 2 жедел мақсаттағы батальон командирінің орынбасары-штаб бастығы талдықорғандық капитан Әлішер Есмағзамов – екеуі де жүлделі 2-орындарды иеленіп келді.
Әскер бойынша батальон буынындағы ең үздік тәрбиеші офицер болып танылған капитан Жүрсін Қабдешұлы:
- Мен осы беделді байқаудың жүлдегерлері қатарында танылғаныма өте қуаныштымын. Біз үш күн бойы барымызды салдық және менің ойымша, әр қатысушы жеңіске лайық екенін көрсетті. Мен үшін бұл байқауға қатысу — нағыз сынақ және кәсіби тұрғыда өсу үшін зор ынталандыру болды. Алған білім мен тәжірибе бізге алдағы уақытта қызметімізде көмектесетініне сенімдімін, – дейді.
Бұл офицерлер – батальон және рота буынындағы әскери қызметшілерге үлгі болар тұлғалар. Осындай байқаудың әскери қызметшілерге беретін мүмкіндіктері зор. Үздіктер алдағы қызметінде жоғары лауазымдарға тағайындалуға бірінші кезектегі үміткерлер қатарына кіреді.
Қазақстан Республикасы Ұлттық ұланы
«Оңтүстік» өңірлік қолбасшылығы
