31 наурыз күні Текелі қаласында полиция қызметкерлерінің кәсіби шеберлігі арқасында 22 жастағы Тимур Абдулин аман қалды. Жас жігіт ес-түссіз күйде қаладағы кешендердің бірінің жертөлесінде табылған.
Кешкі уақытта үйіне қайтып келе жатқан қала тұрғыны «Жетісу Резорт» кешені маңынан танысының көлігін байқайды. Ол жігітті көру үшін ішке кіргенімен, еш жерден таба алмайды. Қауіптенген азамат телефон соққанымен, жауап ала алмаған соң іздеуге кіріседі. Жертөлеге түскенде Тимурдың телефонын, кілтін және сырт киімдерін тауып, әрі қарай іздестіргенде оны ес-түссіз жатқан жерінен көреді.
Полицияның шұғыл көмегі
Тұрғын бірден көмек сұрауға көшеге жүгіріп шығып, өтіп бара жатқан патрульдік полиция көлігін тоқтатады. Оқиға орнына жедел жеткен полиция капитаны Азамат Қазыбаев, Елдар Амангельдин және аға лейтенант Жанатбек Ахметов жігітті қауіпсіз жерге шығарып, алғашқы медициналық көмек көрсетеді. Артынша жедел жәрдем шақырылып, жас жігіт дәрігерлерге тапсырылды. Дәрігерлер полиция қызметкерлерінің шұғыл әрекеті Тимурдың өмірін сақтап қалуда шешуші рөл атқарғанын атап өтті.
Батылдық пен жанқиярлық үлгісі
Айта кетейік, полиция капитаны Азамат Қазыбаев бұған дейін де батырлық танытқан. 2011 жылы ол шетелдік делегацияны тасымалдаған автобусты апаттан сақтап қалған болатын. Алматы – Көкпек – Көктал тасжолында қарсы бағытқа шыққан көлік автобусқа соғылу қаупін төндірген кезде, Қазыбаев патрульдік көлігімен жолды жауып, қатерді өз мойнына алған. Осы ерлігі үшін ол «Ерлігі үшін» медалімен марапатталған.
«Жетісу-Ақпарат»
Фото: видеодан алынған кадр
