Панфилов ауданында ҚР Сыбайлас жемқорлыққа қарсы іс-қимыл агенттігі облыстық департаментінің басшысы Саян Ахметжанов өңір активімен кездесу өткізді. Оған қала, ауылдық округ әкімдері, мекеме басшылары, қоғамдық ұйымдар мен құқық қорғау орындарының қызметкерлері қатысты.
Жиында Саян Ахметжанов өткен жылы аймақта жемқорлықтың жолын кесу бағытында атқарылған жұмыстар жөнінде жан-жақты дәйекті, сарапты баяндама жасады.
– Денсаулық сақтау саласында 400 миллион теңге көлемінде 27 медицина мекемесі басшыларының заңсыз қосымша төлемақылары түріндегі бюджетке келтірген залалдарының алды алынды. Профильді басқарманың лауазымдық жалақылар мөлшерін бекіту туралы бұйрығының күші жойылды. Денсаулық сақтау министрлігімен еңбекақыны есептеудің бірыңғай әдістемесі әзірленуде. Білім беру саласында күмәнді аударымдар бойынша уәкілетті мемлекеттік органдармен ай сайын салыстыру жұмыстарын жүргіземіз. Республика бойынша бухгалтерлерге ЭЦҚ кілттерін заңсыз беруді шектейтін және басшылардың дербес жауапкершілігін арттырған «Favoritmobile» смартфондарға арналған қосымшасын кеңейттік. Колледждердің қызметіндегі 66 миллион теңге көлеміндегі заңсыз төлемдер қайтарылды. Лауазымдық жалақы мөлшері Үкіметтің «Азаматтық қызметшілердің еңбекақы төлеу жүйесі туралы» №1193 қаулысына сәйкес, ал үстемеақылар байқау кеңестерінің шешімдерінің негізінде анықталады, – деді Саян Қылышұлы.
Департамент басшысының мәліметінше, қос қаржыландыру және еңбек қызметін тоқтатқан адамдарға төлемдерді аудару фактілері бойынша бюджетке 4 миллион теңге қайтарылған. Еңбек және әлеуметтік қорғау департаменті басшылығы тарапынан мүгедектікті белгілеу үшін пара алу әрекетінің жолы кесілді. Тәуекелдерді болдырмау бойынша ұсыныс енгізілген.
Сыбайлас жемқорлықтың жүйелі фактілерін, соның ішінде жоғары лауазымды тұлғалардың қатысуымен құқықбұзушылықтарды анықтау, азаматтардың құқықтарының бұзылуына жол бермеу және келтірілген залалды өтеу бойынша шаралар қабылдау қарекеттері жалғастырылуда. Аймақтық сыбайлас жемқорлыққа қарсы іс-қимыл басшысының баяндамасында облыста және өңірлерде орын алған жемқорлық фактілері жіліктеп жеткізілді. Әсіресе жол құрылысы, халықты ауызсумен жабдықтау, спорт ұйымдары арасындағы, ауылшаруашылық өндірісі саласындағы жемқорлықтың жолын кесу мәселелері бойынша жұмыстар жанданғаны айқын аңғарылды. Сонымен қатар, сыбайлас жемқорлықтың алдын алу шараларының әдістемелік тәжірибелік жолдары бағытындағы жұмыстар талданды.
Баяндама барысында Панфилов ауданына қатысты бірқатар мәселелер көрсетілді. Атап айтқанда, аудандық ауруханада бір литр сүтті сатып алу бағасын екі есе жоғарылатқан. Жаркент су құбыры мекемесінде де тура осындай, өздеріне қажет материалды жоғары бағада сатып алу фактілері орын алған. Бұл келеңсіздіктер дер кезінде анықталып, жөнге келтіріліпті.
Мырзағали НҰРСЕЙІТ
