ҚР Қорғаныс министрлігіне қарасты №40398 әскери бөлімінде Үшарал гарнизоны бастығының кубогіне арналған әскери қоян-қолтық ұрыстан жарыс өтті. Дүбірлі додада ҚР ҰҚК шегара қызметі Жетісу облыстық департаментінің Алакөл ауданы бойынша шегара басқармасының әскери қызметшілері де бақ сынап, жүлдемен оралды.
Жарысқа 100-ге жуық балуан қатысты. Сайыс қорытындысы бойынша №40398 әскери бөлімнің қызметкерлері жалпыкомандалық есепте 1-орынды жеңіп алды. Атап айтсақ, 57 келі салмақта қоян-қолтық ұрыстан спорт шеберіне үміткер ефрейтор Әсет Ахметбеков алтыннан алқа тақты. 62 келіде қатардағы жауынгер Ұлан Шабданов жеңімпаз атанса, қатардағы жауынгер Бекасыл Ысқақов күміспен күптелді. 73 келі салмақта майор Алмас Сағидолдаұлы чемпион атанды. 80 келі салмақта ефрейтор Ержан Жабайханов күміс жүлдені еншіледі. 88 келіде қоян-қолтық ұрысынан спорт шебері, кіші сержант Ербол Тұңғатаров жеңістің желкенін көтерді. 97 келіде кіші сержант Ұлан Әлекеев чемпион атанса, кіші сержант Ерасыл Баянбаев тұғырдың екінші сатысынан көрінді. +97 келі салмақта қоян-қолтық ұрысынан спорт шеберіне үміткер сержант Ербол Борашев қарсыластарын қоғадай жапырып, алтыннан алқа тақты.
Спорттық сайыс екі жылдан бері жүйелі түрде ұйымдастырылып келеді. 2022 жылы Алакөл ауданы бойынша шегара басқармасының әскери қызметшілері, былтыр №40398 әскери бөлімінің әскери қызметшілері жеңімпаз атанды.
Айдар ҚАЛИЕВ
