Жетісу облысында енді жол ережесін бұзған жүргізушілер дрон арқылы анықталады, деп хабарлайды 7-su.kz желілік басылымы.
Жетісу облысы Полиция департаменті таратқан ақпаратта:
Қазіргі заманауи технологиялар қоғамдық қауіпсіздікті қамтамасыз етудің маңызды құралына айналып келеді. Сол жаңашылдықтардың бірі – патрульдік полиция қызметкерлерінің пилотсыз ұшу аппараттарын (дрондарды) қолдануы. Патрульдік полиция батальонында дрондар белсенді түрде пайдаланылып жатыр, ал алғашқы нәтижелер бұл технологияның жоғары тиімділігін көрсетуде. Дрондар полицияға жол қозғалысын биіктіктен бақылауға, заңбұзушылықтарды жылдам анықтауға және экипаждардың жұмысын үйлестіруге мүмкіндік береді. Олар жол қозғалысы ережелерін бұзуды анықтаудан бастап басқа да бағыттарда қолданылады, — делінген.
Дорон арқылы тәртіп сақшылары тек заңбұзушылықтарды ғана анықтап қоймай, қиын жағдайға тап болған жүргізушілерге көмек көрсетеді. Айталық, дрондар жолда қалып қойған көліктерді, дөңгелегі жарылған немесе техникалық ақауы бар машиналарды биіктіктен жылдам анықтауға көмектеседі. Бұл дер кезінде жүргізушілерге көмектесуге мүмкіндік береді.
Сонымен қатар, тас жолдарда жиі туындайтын мәселелердің бірі, қараусыз жүрген ауыл шаруашылығы малдарының жолдарға шығып кету жағдайларын анықтайды.
Фото: Жетісу облысы Полиция департаменті
