Жетісу облысының Ескелді ауданындағы Қарабұлақ ауылында жас құтқарушылардың кезекті кадет сыныбының салтанатты ашылу рәсімі өтті. Іс-шара Құтқарушылар күні мерекесі қарсаңында ұйымдастырылды. Бұл сынып өңірдегі бесінші кадет сыныбы болып табылады және мектеп оқушылары арасында құтқарушы мамандығына деген қызығушылықтың арта түскенін көрсетеді.
Жас кадеттер төтенше жағдайлар кезіндегі қауіпсіздік негіздеріне үйреніп, саптық дайындықтан өтіп, мектепішілік және ведомстволық іс-шараларға белсенді қатысады. Атап өту керек, Жетісу облысының Төтенше жағдайлар департаментінің қызметкерлері жас ұрпақпен жүйелі жұмыс жүргізуде. Негізгі назар балаларға төтенше жағдайлар кезіндегі дұрыс әрекет ету ережелерін үйретуге бағытталған, бұл олардың қауіпсіздік дағдыларын ерте жастан қалыптастыруға ықпал етеді.
Кадет сыныптарына деген қызығушылықтың артуы олардың жасөспірімдерге жауапкершілікті әрі төтенше жағдайларда дұрыс әрекет етуге қабілетті азаматтар тәрбиелеудегі маңыздылығымен түсіндіріледі. Осыған орай, мұндай сыныптар тек ірі қалаларда ғана емес, сонымен қатар облыстың шалғай аудандарында да ашылуда.
Бұған дейін жас құтқарушылардың кадет сыныптары Талдықорған мен Текелі қалаларында, сондай-ақ Панфилов және Ақсу аудандарында ашылған болатын. Қарабұлақта ашылған бесінші сынып осы маңызды бастаманың дамуына жасалған тағы бір қадам болды.
Жаңа кадет сыныбының ашылуына орай Жетісу облысының Білім басқармасымен бірлесіп, облыстағы «Жас құтқарушылар» кадет сыныптарының арасында жарыстар өткізілді. Бұл жарыстар кадеттер үшін өздерінің білімдері мен дағдыларын нақты төтенше жағдайларға жақын шарттарда көрсетуге тамаша мүмкіндік болды.
Қарабұлақта бесінші кадет сыныбының салтанатты ашылуы – бұл жас құтқарушыларды даярлау жүйесін дамытудағы кезекті қадам ғана емес, сонымен қатар Жетісу облысының жауапты және дайын жас ұрпақты тәрбиелеуге деген ұмтылысын айқындайтын маңызды оқиға.
Жетісу облысы ТЖД баспасөз қызметі
Фото: gov.kz
