Жетісу облысы Полиция департаментінің ғимаратында «Жас сақшы» жобасы аясында «дөңгелек үстел» өтті, деп хабарайды 7-su.kz желілік басылымы.
Оқушылар мен студенттерге кибербуллинг, есірткі қылмысы, бопсалау және басқа да қауіптер туралы жасырын түрде хабарлау үшін маңызды ақпаратты жеткізуді мақсатында WhatsApp мессенджерінде арнайы чат құрылды. Онда әр оқушы ақпаратпен жасырын түрде бөлісе алады. Мұндай бастама өңір жастарының басым бөлігін қамтуға және құқық бұзушылықтар туралы қауіпсіз және ашық ақпарат алмасу үшін платформа құруға мүмкіндік береді.
Полиция департаментінде өткен іс-шара барысында оқушыларға жастар қылмысы және оның салдары туралы бейнероликтер көрсетілді. Сондай-ақ, қатысушылар департамент мұражайында өңір полициясының тарихымен танысып, Жедел басқару орталығының жұмысын көре алды.
Кездесуге қатысқан мұғалімдер мен оқушылар «Жас сақшы» жобасына қолдауын білдірді. Олар сұрақтар қойып, жастардың қауіпсіздігі мен құқықтарын қорғау тақырыбына қызығушылық танытты.
Фото: Жетісу облысы ПД
