Құрылтай депутаттарын сайлау күні Талдықорған қаласындағы №433 сайлау учаскесінде ерекше сәт орын алды. 18 жастағы егіздер Ерке мен Ару Жансерік алғаш рет сайлауға қатысып, өз таңдауларын жасады.
Бір күнде дүниеге келген егіздер кәмелет жасына толғаннан кейінгі алғашқы таңдауларын да бірге жасады. Биыл мамыр айында 18 жасқа толған олар үшін бұл күн ерекше әрі есте қаларлық сәтке айналды.
– Бүгінгі Құрылтай депутаттарын сайлауына сыңарым Арумен бірге келіп, алғаш рет дауыс бердік. Біз биыл мамыр айында ғана 18 жасқа толған едік. Енді, міне, алғашқы сайлауымызға қатысып, өз таңдауымызды жасап отырмыз. Болашақ жастардың қолында. Сондықтан біз жарқын болашағымыз үшін дауыс бердік. Бұл күн біз үшін ерекше әрі ұмытылмас сәт болып қалары сөзсіз, – деді Ерке Жансерік.
Ерке мен Ару отбасындағы тұңғыш балалар. Олардың өздерінен кейінгі сіңлісі бар. Егіздердің өміріндегі маңызды сәтте отбасы мүшелері де жанынан табылып, қолдау көрсетті.
Бірге дүниеге келіп, бірге ер жеткен егіздердің алғашқы таңдауларын да қатар жасауы сайлау күніндегі есте қаларлық сәттердің біріне айналды.
