Сүйінбай мен Жамбыл елінде тағы бір тамаша рухани шара болды. Сенбі күні аудандық Мәдениет үйінде Қазақстан Жазушылар одағының мүшесі, қаламы қарымды журналист, Жамбыл аудандық «Атамекен» газетінің директор-бас редакторы Рәтбек ТЕРЛІКБАЕВТЫҢ 60 жасқа толуына арналған шығармашылық кеші өтті.
Мәдени шараға алыс-жақыннан жиналған жұртшылықтың назарына алдымен қаламгердің өмірбаянынан сыр шертетін бейнефильм ұсынылды. Аудан әкімі Бағдат Әлиев мерейтой иесін құттықтап, аудандық мәслихат шешімімен бекітілген «Жамбыл ауданының Құрметті азаматы» атағын салтанатты жағдайда тапсырды.
Баспасөз саласында қырық жылға жуық жемісті еңбек етіп келе жатқан Рәтбек Сәдуақасұлының ақындық қыры өз алдына бір төбе. Кештің өне бойы ақын шығармасы негізінде әзірленген поэтикалық композициямен әдемі өріліп, көрерменді тамаша әсерге бөледі. Образға еніп өнер көрсеткен аудандық Мәдениет үйінің өнерпаздары өлеңді фоно-граммасыз, жанды дауыспен жатқа оқуымен ерекшеленді. Өз өмірін кестелі сөзбен айшықтаған ақын туындылары тілге жеңіл, жүрекке жылы тиіп жатты. Сондай-ақ, ақын сөзіне жазылған «От-ана Отан», «Жамбыл атам елі», «Қазағым», «Өріктің гүлі», «Алматы» әндері шырқалды.
Сахна төрінде асқаралы алпыстың белесіне үзеңгі салған арда азаматқа деген ақ тілектер ақтарылып, сый-сияпат көрсетілді. Бұл орайда белгілі ақын-жазушылар, өнер мен мәдениет майталмандары, шығармашылық ұйымдар, осы ауданнан шыққан азаматтар атынан жылы лебіздер молынан айтылды. Қазақстан Жазушылар одағы басқармасының төрағасы Ұлықбек Есдәулеттің, Талдықорған қаласының әкімі Дастан Шалтабаевтың, Қарасай ауданының әкімі Жандарбек Далабаевтың жолдаған ыстық ықыластары білдірілді.
Баспасөз бетінде Рәтбек Сағид-Уәһәс есімімен белгілі мерейтой иесі біраз жыл «Жетісу» газетінің меншікті тілшісі қызметін жемісті атқарған болатын. Шебер журналистке облыстың басты басылымының басшылары мен ұжымының ізгі тілегін газеттің бас редакторының орынбасары, ақын, әріптес, қатарлас әрі осы ауданның перзенті Нүсіпбай Әбдірахым жеткізді.
Қабырғалы қаламгерлер Жұмабай Шаштайұлы, Бауыржан Жақып, Жанарбек Әшімжан, Әбубәкір Қайран, Орысбай Әбділдаұлы, Жұмаш Арғымбайұлы, Жанат Ахмади, Қуат Қайранбаев, Надежда Лушникова, Күмісжан Байжан, Ермек Жұматаевтың ізгі тілектері мен ой-пікірлерінде, оқыған арнау жырларында қаламы ұшқыр, ойы жүйрік, білімі телегей, тілі шұрайлы, бекзат болмысты Рәтбек Терлікбаевтың сан қыры әңгімеге кеңінен арқау етілді. Ақындар мен батырлар елінің азаматтары атынан Әскербек Абаев, ардагер ұстаз Дәукеш Әмірқызы, аудандық аналар кеңесінің төрайымы Күміс Пармашқызы, аққайнарлық ағасы Болат Райымжанов ақсақал жүрекжарды тілектерін білдірді. Шара соңында кеш иесі сөз алып, мерейін өсірген барша қауымға жүрекжарды алғысын айтты.
Мерейтой иесі баспа саласында да жемісті еңбек етіп келеді. Оның тікелей редакторлығымен бірнеше көлемді тарихи-өлкетану жинақтар мен авторлардың көркем шығармалары жарыққа шыққан. Сол күні оның сиясы кеппеген «Перне» атты жеке жыр кітабы оқырман қолына тиді. Қарымды қаламгер, сүйікті жар, алтындай ұл мен қыздың ардақты әкесінің алпысқа толуы аудан орталығындағы мейрамханада жайылған ақ дастарқан үстінде туған-туыс, жора-жолдас, жекжат-жұраттар ортасында жалғасты.
Серік САТЫБАЛДИЕВ
Жамбыл ауданы
