Жетісу облысында 14 пен 35 жасқа дейінгі жастар саны статистикалық деректерге сәйкес 186 895 адамды құрайды. Оның 82 837-і қалалық жерде, 104 058-і ауылда тіркелген. Бұл жайлы Бейсен Құранбек атындағы Журналистер үйінде өткен брифингте облыстық қоғамдық даму басқармасы басшысының орынбасары Ілияс Түстікбаев баяндады.
Соңғы жарты жылда NEET санатындағы жастармен жұмысты күшейту және санын азайту, мемлекеттік бағдарламалар мен жобалар аясында бағыт-бағдар беру мақсатында 1360 жастың қатысуымен 39 кездесу өтті. Сонымен қатар, аудан, қала, ауыл жастарына «Ауыл аманаты» мен жастарға арналған 2,5 пайыздық жеңілдетілген несие беру жобалары туралы 78 ақпараттық-түсіндірме жұмыстары жүргізілді. Аталған шараға жалпы 1 200 жас қатысты.
Биыл шілденің 1-нен Жетісу облысының жұмыспен қамту органдарына 35 жасқа дейінгі жастар арасынан 6 651 адам жүгінді, оларға жұмыспен қамтуға жәрдемдесудің 3 673 белсенді шаралары көрсетілген. 3 079 адам жұмысқа тұрса, оның ішінде тұрақты жұмыс орындарына 1 445 адам орналастырылды.
Брифингте, сондай-ақ, өңірдегі жастар арасындағы нашақорлық, суицид, лудомания, ерте жүктілік сынды мәселелер қозғалды. Мәселен, жарты жыл ішінде ерте жүктіліктің 58 жағдайы тіркелген. 2024 жылдың І тоқсанында 8 суицид, 5 суицид әрекеті тіркелді. Суицидтің алдын алу мақсатында облыс бойынша 789 жастың қатысуымен «дөңгелек үстел», кездесулер, психологиялық сергітулер өткізілді. Облыс бойынша жалпы саны 230 есірткі тұтынушысы, оның ішінде 18-29 жас аралығындағы 37 (Ақсу ауданы – 1, Алакөл ауданы – 1, Ескелді ауданы – 1, Қаратал ауданы – 3, Панфилов ауданы – 5, Текелі қаласы – 2, Талдықорған қаласы – 24) адам, одан бөлек, синтетикалық 15, каннобиоидты қолданушылар 20, психоактивті заттарды бірнеше рет қолданудың 2 дерегі тіркелген. Жыл басынан жастар арасында нашақорлықтың алдын алуға бағытталған 190 шара ұйымдастырылды. Оның ішінде 35 акция, 12 түсіндірме жұмыстары, 6 дөңгелек үстел, 29 дәріс, 39 семинар-конференция, 1 флешмоб, 18 спорттық шаралар өткізіліп, 54 бейнежазба түсіріліп, 32 шара әлеуметтік желілерге жарияланды.
Айғаным АЙТМҰХАН
