Әрбір ата-ана үшін баланың ұлағатты ұстаздан, тәлімі зор тәрбиешіден өнеге алуы аса маңызды. Жолымызда жақсы ұстаз кездессе баладай мәз болып, жадырап қалатынымыз сондықтан. №7 ясли бақшасының тәрбиешісі Дина Нұржанова, міне, осындай ата- аналар да, балалар да құрмет тұтатын жан.
Өз жұмысына адал берілген, балаларды шынайы сүйетін тәрбиешінің жұмыс күні әр балдырғанның балабақшаға қандай көңіл-күймен келгенін бағып, оларды өзіне тартып еркелетіп, анасындай баурап, жылы сөздерін арнаудан басталады. Сүйіспеншілікті сезінген бүлдіршіндер де тәрбиешілерін жатсынбай қуана құшағына енеді. Бірін еркелетіп, енді бірі шектен шығып бара жатса тәртіптеп, баланың көңілін әр нәрсені танып білуге қызықтыра жетелейтін ұлағатты жанның үнемі ізденіс үстінде жүретінін байқау қиын емес. Оған Дина Еспайқызының балаларды қызықтыра өткізген сабақтары мен ертеңгіліктері дәлел.
Педагог бүлдіршіндерге халқымыздың дәстүрін, мәдениетін, тілін үйретіп, насихаттауға да ерекше мән береді. Оны «Қазақшаң қалай?», «Екі жұлдыз», «Күз байлығы», «Қыс қызығы», «Ананың алақаны айдынды қоныс», «Мен енді мектепке барамын», «Мен бір жасқа есейдім» атты оқу тәрбие іс-шаралары мен ата-аналар жиналысының қорытындыларынан көруге болады.
Уақыт талабына сай білім беруде тәрбиеші SТЕМ оқыту әдісін қолданып, балаларды робототехника, 3D-жобалауға қызықтыруда. Ойын сабақтарында дамыта оқыту, өнертапқыш шығармашылық тапсырмалар арқылы жеткіншектерді алғырлыққа, тапқырлыққа жетелеуде.
Ата-аналармен де тығыз қарым-қатынас орната білген тәрбиеші жиналысты онлайн негізде өткізіп, оқу-тәрбие жоспарымен таныстырды. Биыл да балаларымыздың балабақша қабырғасынан қажетті білім алып, дүниетанымын арттырып, келер жылы мектепке үлкен дайындықпен барарына кәміл сенеміз. Осы үшін тәрбиеші Дина Еспайқызына зор алғыс айтамыз.
Зарина Болоспаева,
№7 ясли бақшасының «Көбелек» тобы
ата-аналарының атынан
Талдықорған қаласы
