Бүгінде бәріміздің қолымызда бір-бір сымсыз құрылғыдан бар. Иә, бұл күнде сыңарымызға айналып үлгерген смартфонның адамзат баласына тигізіп жатқан зияны жоқ емес. Алайда тиімді тұстарын айтып өткеніміз абзал. Мәселен, кез келген уақытта қалтафонның көмегімен қалағанымызша сәтті кадрларды түсіре аламыз. Осындай қолда бар дүниенің қадірін арттырып, жансыз дүниеге жан бітіріп, әрбір кадрдан креативті әрі әдемі көрініс істей алу екінің бірінің қолынан келе бермейді. Себебі қазір камераға керемет түсірудің өзі кәдімгі бір мамандыққа айналған. Сұлулықтың бәрін смартфонға сыйдыра алатындарды заманауи тілмен айтқанда мобилограф дейміз.
Бүгінде трендтегі мамандықты игеріп жатқан жастар бар. Солардың бірі – Әлібек Шалтабаев. Кейіпкеріміз небәрі 1 жылдың ішінде облыста өзіндік қолтаңбасы бар мобилограф ретінде танылып келеді. Ол қазіргі күні қаланың көрікті келбетін келістіріп, облыстың айшықты жерлерінен әсерлі кадрлар ұсынуда. Негізі Әлібектің негізгі мамандығы ветеринарлық дәрігер. Бірақ бүгінде өз мамандығын смартфонға алмастырып, сапалы бейнелер түсіріп, ұсынып жүрген жайы бар.
Бұл саланың артықшылығы еркіндікте. Біріншіден, кімді қалай түсірсең де ол сенің қиял еркіндігіңде жатқан нәрсе. Еркіндік бар жерде қашанда артықшылық болады. Екіншіден, бұл мамандықта бір ғана жерде тұрақталып қалу жоқ. Мәселен, блогердің жеке мобилографы болып шетел көру мүмкіндіктері бар. Шетелге шыққан кез келген саладағы адамның көкжиегі кеңейері қашанда анық. Үшіншіден, бұл саланың тағы бір артықшылығы – уақыттың үнемді болуында. Бұл салада таңғы 9-дан кешкі 6-ға дейін жұмыс істеу міндетті емес. Бір күнде бірнеше жоба алып жұмыс жасауға болады. Сонымен қатар, мобилограф болу жас талғамайды. Расында, 10 жастағы баладан зейнет жасындағы ата мен әжелердің үйреніп жүргенін көз көріп, құлақ естіп жүр.
– Осыдан 4-5 жыл бұрын мобилография жайлы ешкім де ештеңе білмеп еді. Бірақ, қазіргі таңда бұл жастар мен кәсіпкерлердің арасындағы жаңа табыс көзі. Қазіргі уақытта кез келген сала қызметкерлерінің жеке мобилографы бар. Тіпті сондай мобилографтар табыс тауып, шетел аралап жүр. Бұл заманауи мамандықтың дамығанына тағы бір дәлел. Шынымен бүгінгі таңда мобилографияны мойындағандардың саны артуда. Дей тұрғанмен, өнімді әрі сапалы жұмыс ұсынатындардың қатары санаулы. Сәйкесінше, видеоға сай музыка таңдау да маңызды. Өйткені сіз жасаған роликте әуеннің алар орны ерекше. Бастысы, сүйікті ісіңмен айналысу және де мақсат қою діттеген жолыңмен жүріп, арманыңа жету керек, – деді ол.
Әлібек бүгінгі таңда Жетісу облысының өңірлік коммуникациялар қызметінде мобилограф болып жұмыс істейді. 2 жылдық жұмыс тәжірбиесінде талай шығармашылық еңбектері еленді. Айта кетейік, өңіріміздегі әр шараны айшықтап беретін маман да осы Әлібек. Бүгінде ол әкімнің қатысуымен болатын мемлекеттік, халықаралық шараларды түсіріп жүр.
Балқашқа іссапар
Жазушы, журналист Мамытбек Қалдыбаев «Жетісу» газетіне қызметке тұрғасын Балқаш ауданына іссапарға барып, балықшылар жайында көлемді мақала жазып қайту жөнінде тапсырма алады.
Жамбыл облысында туып-өскен, ақкөңілдігіне аңқаулығы да жарасып тұратын ағамыз Алматының маңында Балқаш деген ауданның барын бұрын-соңды естімесе керек, бірден әуежайға барып Балқаш қаласына билет алып ұшып кетеді. Барған бойда Жезқазған облысы басшысының идеология жөніндегі хатшысының қабылдауына кіріп, «Жетісу» газетінен іссапарға келгенін айтады.
Өз кезегінде «Жетісу» деген газеттің барын естімеген хатшы да таңғалып қалады. Сонымен әңгіме барысында ақиқат анықталып, қонақжай хатшы шалғайдан келген қонақ тілшіге дастарқан жайып, сый-құрметін көрсетіп шығарып салады. Көлге шығып бара жатқан кемені тоқтатып, Балқаш көлі арқылы Құйғанның балықшыларына жеткізіп салуды тапсырады.
Хатшының ықыласына көңілі толып, бір мезгілде балықшыларға да уақытында жететініне, сөйтіп тапсырманы орындап үлгеретініне көзі жеткен Мамытбек ағамыздың көңілі жайланып сала беріпті.
А. ӘБІЛТАЙҚЫЗЫ
