Болат аға қазақтың біртуар ұлы Дінмұхамед Қонаев жайлы көп жазды. Ел экономикасының көтерілуіне ерекше еңбек сіңірген Қонаевтың туған күнінің қарсаңында Болат аға мақала жазып әкеледі деп күтетінбіз. Ол кісінің есте сақтау қабілеті керемет еді. «Қырық жылғы» оқиғаны ұмытпайтын. Әр деталіне дейін айтып беретін. «Бір мың тоғыз жүз жетпіс бәленбайыншы жылы редакцияда жиналыс өтіп, сонда пәленбай былай деп сөйлеген» деп сөзін үтір, нүктесіне дейін қайталап, жиналыстың барысын ретімен, қаз-қалпында баяндайтын. Әңгіменің тоқетерін: «Сонда бар ғой» деп топшылап, адамдардың қандай қиын сәтте де адалдықтан айнымайтын асыл қасиетімен сабақтастыратын. Естелікті түйіндеген соң мәселенің әділ шешілгенін айтып, сол жағдай бүгін болғандай рахаттанып күліп алатын. «Жақсылыққа жаны құмар» деп осындай адамдарды айтса керек.
Еңбек жолын Ақсу ауданының «Өмір нұры» газетінен бастаған Болат Бисұлтанұлы ауылшаруашылық мамандарының ілгерінді ісін газет бетінен түсірмеуге күн-түн демей еңбек етті. Ол кезде коммунистік партияның аудандық комитеті газетке шығып бара жатқан әр мақаланы қадағалап оқып, содан кейін басуға рұқсат беретін. Сонымен газет түннің бір уағында шығады. Ол кезде компьютер деген атымен жоқ. Жалғыз машинка газетке шығатын барлық мақаланы теруге міндетті. Содан кейін баспаханада бүкіл әріпті қорғасынмен қайта теріп шығады. Таңертең газет оқырманның қолына уақытында жетуі тиіс. Кей кездері орталықтан келетін жиналыстарды күтіп, теріп таңға дейін жүретін. Мұндай іске мамандығын сүйетін, ыстық-суығына бірдей көнетін қаламгерлер ғана шыдайтын.
Болат Бисұлтанов Қапал ауданының «Қапал еңбеккері» газетінде тұшымды еңбек еткен кезде қазіргідей көлік жоқ. Тілші малды ауылды, егіндікті жаяу аралайтын. Сөйтіп жүріп еңбек адамдарын газетке үзбей шығарып, еңбек жолын көпке үлгі ететін. Баспасөз – тәрбие құралы. Алдыңғы қатарлы комбайншы, сушы, диқанды жас ұрпаққа үлгі ететін. Солайша, талай жас өз бақытын жұмысшы мамандығынан тапты.
– Болат Бисұлтанұлы 1996-97 жылдары Сарқан аудандық «Сарқан» газетін басқарды. Сол жылдары газет тарап кеткен. Болат аға редакцияның басын қайта құрады. Тоқырау жылдары газетке жазылым төмендеп кеткен еді. Газет 300 данамен қорғасын қалыппен шығарылды. Сөйтіп, Болат Бисұлтанов газет тарихын қайта жалғап берді, – дейді «Сарқан» газетінің бүгінгі редакторы Жомарт Игіман. Бұл – ерлік!
Талдықорған облыстық «Жер- ұйық» газетінің бірнеше бфөлімін басқарған Болат аға ұжымда кәсіподақты басқарды. Сол кездегі газет корректоры Злиха Құмғамбаева: «Болат аға керемет адал еді. Ол кезде сары май, шұжық деген тапшы. Журналистер мақала жазып, сауда үйлерінен азық-түлік әкеледі. Оны кәсіподақ басшысы ретінде Болат аға бәріне теңдей бөлетін. «Әй, ананың жас баласы бар. Анау жалғызбасты ана, оған көбірек берейік!» деп жастарға қамқорлық танытатын» – деп ағаның үлкен жүректілігін еске алады. Кейіннен Алматыдағы Жоғары партия мектебін тамамдаған Болат Бисұлтанов алған білімін қызметте пайдаланды.
«Жетісу» газетінің 100 жылдығына орай шығарылған кітапқа «Жер-ұйық» газеті қызметкерлерінің аты-жөнін кіргіздік. Тізімді жасарда сол газетте ұзақ жыл еңбек еткен Болат Бисұлтанұлымен ақылдастық. Жоғарыда айтқандай, ешкімді ұмытпайтын ол барлық қызметкердің аты-жөнін қолмен қойғандай айтып берді. Сол үшін бірнеше рет редакцияға келіп, тізімді қайта-қайта тексеріп, ешкімнің қалып қалмауын қадағалады. «Бәленбай деген корректор қыз 2 ай істеп, шығып кеткен» деп газетке еңбегі сіңгендерді түгендеді.
Сол кездерді сағына еске алған ұлы Нұрлан:
– Әкем газеттің спорт бөлімін басқарды. Спорттық шараларды жазуға барғанда бізді кезек-кезек ертіп алатын. Мен футболдан қалмайтынмын. Асқар тау әкеміз адал еңбек етуге тәрбиеледі. Сағынып жүрміз… – деп өткен күндерді ой елегінен өткізді.
Жары Советай Нұрғалымқызы екеуі 4 перзент сүйді. Балалары бүгінде әр салада еңбек етіп, әке атына кір келтірмей келе жатыр. Болат ағаның немерелері мен шөберелері өмірінің жалғасы.
Қайран ағатайым, қалқайып келіп тұрушы еді. Соңғы кездері жанарының нашарлағанын, ота жасататынын, содан кейін тұшымды мақалалар жазып әкелетінін айтқан-ды. Ота сәтті жасалды дегенді естіп, қуанып қалып едік… Бірақ тосыннан келген ажал қоя ма?! Үйіне кіріп, табалдырықтан аттаған күйі жүріп кетіпті. Осылайша табалдырықтан биік тау, шаңырақтан қасиетті мекеннің жоқтығын дәлелдеді.
Гүлжан ТҰРСЫН
