Оқи отырыңыз
Ел Тәуелсіздігінің 25 жылдығына орай Талдықорған қаласының солтүстік-батыс ауданында фельдшерлік-амбулаториялық пункт, полиция бөлімшесі, кітапхана және ардагерлер бөлмесін қамтыған ғимарат пайдалануға берілді. Бірнеше жыл бұрын салынған ғимарат бір кездері зооветеринарлық техникумның оқу-тәжірибелік шаруашылығына арнап тұрғызылған. Жаңғыртылған бір қабатты ғимаратты қала әкімдігі саяжай тұрғындарының игілігіне беруді жөн деп тауыпты. Осыған орай салтанатты жиынға арнайы барған қала әкімі Бағдат Қарасаев көпшілікті келе жатқан мерекемен құттықтады. Барлығы 597 адам тұратын шағын ауылдың халқы енді алысқа сабылмай-ақ дәрігер мен тәртіп сақшысына жүгіне алады.
Дәл осы күні Талдықорған қаласында барлығы 130 балаға арналған 4 балабақша ашылып, сәбилерді қабылдады. Бұл балабақшалардың барлығы да мемлекет пен жекеменшік арасындағы әріптестік негізінде пайдалануға беріліп отыр. Яғни, кәсіпкерлердің қаржысына салынған мектепке дейінгі тәрбие мекемелеріне жергілікті атқару органдары қолдау көрсетіп, қажетті тетіктеріне көмектеседі. Жалпы жыл басынан бері 9 жекеменшік балабақша ашылып, 3-6 жастағы балаларды бақшамен қамту көрсеткіші 87 пайызға жеткен.
Балабақшалардың ашылу салтанатына қатысқан қала әкімі Бағдат Қарасаев тұрғындарды жаңа нысанның ашылуымен құттықтады.
– Құрметті талдықорғандықтар, қадірменді жерлестер! Тәуелсіздік мерекесі құтты болсын! Мінеки, бүгін бәріміз сәбилердің қуанышын еселеп, ата-аналарды бір серпілткен айтулы шараға жиналып отырмыз, – деген Бағдат Әбілмәжінұлы облыс орталығындағы балалардың санына тоқталып өтті. – Халқымыз: «Ұлым дейтін ел болмаса, елім дейтін бала қайдан шықсын?!» – дейді. Болашақ ұрпақтың тәрбиесіне үлес қосуды ойластырған кәсіпкерлеріміздің ісіне Жаратқан Алла Тағала береке берсін. Өйткені, жыл сайын қаламыздағы тұрғындардың өсімі, бала туу деңгейі артып отыр. Жылына шамамен 2 мың 800-дей адам қосылады. Сондықтан да болар, сәбилерді балабақшамен толық қамту біртіндеп жүзеге асырылып келеді. Қазір 7464 бала балабақшаға барады. Одан бөлек, 9 мың бала кезекте тұр. Бүгінгі күні пайдалануға берілген балабақшалар құтты болсын! Кәсіпкерлерге айтарым, әрқашанда игілікті істердің ұйытқысы бола беріңіздер! Сіздерге тек жақсылық тілеп, алғысымызды айтамыз. Себебі, үйлеріңізді балаларға атап, арнайы балабақша жасауларыңыз үлкен ерлік, көргенділік дер едім. Себебі, өсетін елдің ғана болашағының тәрбиесіне күш салатынын жақсы білеміз. Қаладағы 54 балабақшаның 33-і жекеменшік балабақша. Бұл Елбасымыз тапсырған міндет-межелерді орындау жолындағы істердің бір парасы. Сондықтан жаңа балабақшаларыңыз құтты, іші баланың шаттығына толы болсын!
Ел Тәуелсіздігінің 25 жылдығына орай қала орталығындағы үйлердің ауласында спорттық алаңқай ашылып, тұрғындардың пайдалануына берілді. Халықтың игілігі үшін салынған спорт алаңын «Стройсервис-97» жауапкершілігі шектеулі серіктестігінің жұмысшылары тегін жасап берген.
Мәди Алжанбай
