Оқи отырыңыз
Үш жылдай бұрын Талдықорған қаласындағы І.Жансүгіров атындағы Жетісу мемлекеттік университетін бітіріп, Алматы облыстық «Жетісу» газетінің босағасынан еркелей еніп, ата басылымға қатардағы тілші болып қабылданған Мұхтар КҮМІСБЕК сол күні аймақта өткен жас ақындар мүшәйрасында бас жүлдені қанжығасына байлаған еді. Ол өлеңнің аты «Апа, қашан барамыз Астанаға?!» деп аталады.
Бұл ақын баланың астанаға барсам деген асқақ арманының әлі де орындалмаған кезі. Осы өлең Мұхтардың поэзия кеңістігіне еркін қанат қағуына себеп болып, Елордамыздың төрінде өткен мүшәйраға келуіне жол ашты. Ақыры өлеңдегі арманы орындалып, апасына ақтарыла айтқан сырлы өлеңі тағы да Арқа төрінде Мұхтардың айдарынан жел естірді.
Өлеңі ақжолтай болып, бір емес, бірнеше рет астанаға жол тартты. Өткен жыл «Жетісу» газетіндегі Мұхтар Күмісбектің жылы болды. Қарағанды төрінде Қасым Аманжоловқа арналған республикалық жыр додасында бас жүлдегер атанды. Алматы облысы әкімінің жүлдесі үшін дәстүрлі өтіп келе жатқан «Көшбасшы» байқауының жеңімпазы, жас ақындарға арналған «Ақ қауырсын» мүшәйрасының бас жүлдесін иеленді.
Өткен күзде еліміздің бас басылымы «Егемен Қазақстан» республикалық газеті» акционерлік қоғамының Басқарма төрағасы Дархан Қыдырәлі Жетісу жеріне арнайы іссапармен келгенде, топ ішінен хас жүйрікті таныған Күреңбай сыншыдай осы Мұхтарға қолқа салып кетіп еді. Алғашында ауызекі айтылған әңгімеге балағанымызбен Дархан мырза сөзінде тұрып, арада айлар өткенде «Жетісу» газетінің бас редакторы Әміре Әрін ағамызға хабарласып, сол кездегі ұсыныстың пісіп-жетілгенін айтып, Күмісбектің алтын асықтай ұлын «Егемен Қазақстан» газетіне шақырды.
Қашан да «Болайын деген баланың, бетінен қақпай белін буатынды» жақсы көретін Әміре ағамыз баласындай еркелеп, інісіндей елгезектік танытып жүрген Мұхтарға ақ батасын беріп, Нұр-Сұлтанға шығарып салды. Көктемнің алғашқы күні Мұхтар Күмісбектің Арқа төріндегі еліміздің бас басылымы «Егемен Қазақстан» газетіндегі еңбек жолы басталды. Жолың ашық, абыройың асқақ болсын, ақын бала!
"ЖЕТІСУЛЫҚТАР"
