Жетісу облысында «Қарызсыз қоғам» жобасы іске асырылуда

Уақыты: 28.02.2024
Оқылды: 332
Бөлім: КҮНДЕРЕК

5 ақпаннан бастап жеке тұлғалар арасында берешегі бар адамдардың қаржылық сауатын арттыруға бағытталған «Қарызсыз қоғам» жобасы барлық өңірде жүргізіледі. Еліміздегі 17 өңір мен 3 республикалық маңызы бар қаланы қамтитын бұл жобада қаржы сарапшылары халықты оқытып, қаржылық сауатын арттыруға көмектеседі. Әсіресе, онда несие мерзімі 90 күннен асып кеткен азаматтарға басымдық беріледі.

Бұл туралы «AMANAT» партиясы Жетісу облыстық филиалының төрағасы Арыстанғали Арын мен облыстық «Қарызсыз қоғам» жобасының жетекшісі Замзагуль Сламбекова Журналистер үйінде өткен баспасөз мәслихатында мәлімдеді.

Еске сала кетсек, өткен жылы басталған пилоттық жоба өз тиімділігін көрсетіп, жалпыхалықтық бағдарламаға айналды.

«2023 жылы 1 қыркүйекте Мемлекет басшысы Қазақстан халқына Жолдауында «Қарызсыз қоғам» жобасын ерекше атап өтіп, оның игілігін барша халық көруі керек деген еді. Биылдан бастап 17 өңір мен 3 республикалық маңызы бар қаланы қамтитын жобада 150 мыңдай адамды оқыту көзделген. Соның ішінде Жетісу облысында 6 жарым мың адамды оқыту жоспарланып отыр», - деп атап өтті Арыстанғали Қадырұлы.

Оқу басталғалы облыста Ақсу, Ескелді, Көксу, Панфилов аудандары және Талдықорған қаласында 3 аптаның ішінде 750 адам оқудан өтіп, қаржылық сауаттылығын арттырды.

«Жоба бойынша қаржы сарапшылары барлық ауданда жұмыс істей бастайды. Оларға кез келген уақытта барып, кеңес алуға болады. Оқу 3 апта, 5 күн оқытылады. Сонымен қатар жоба аясында еліміздегі барлық жоғары оқу орындарында, колледждерінде және мектептерінде қаржылық сауат бойынша білім беру платформасы іске қосылып, қаржылық сауат курсы енгізіледі. Осылайша, «Қарызсыз қоғам» жобасы аясында әрбір қатысушының өзі және жақындары үшін жеке қаржылық жауапкершілігі, қаражат жинау және жоспарлау мәдениеті қалыптастырылады», - деп қорытындылады Замзагуль Сламбекова.

"Жетісу-Ақпарат"