Оқи отырыңыз
Жетісу облысының әкімі Бейбіт Исабаев қоғам белсенділері, түрлі деңгейдегі мәслихат депутаттары Роза Ақжаркенова мен Елдос Баялышбаевпен кездесті. Олардың мүгедек адамдарды қолдау саласындағы жалпы жұмыс өтілі 26 жылға жеткен. Бейресми кездесуге қатысушылар мүгедек адамдарды әлеуметтік қолдау және өңірде осы бағытта қолға алынған шаралар туралы тақырыптарды талқылады, - деп хабарлайды Жетісу облысы әкімінің баспасөз қызметі.
Әңгімелесу барысында оңалтуға қажетті техникалық құралдармен қамту, әлеуметтік инфрақұрылым объектілерін бейімдеу мен «Инватакси» қызметінің жұмысына ерекше назар аударылды. Жалпы өңірде техникалық оңалту құралдарына мұқтаж мүгедектігі бар адамдардың саны 15 690 құрайды, оның 15 390-ы немесе 98,1% қажетті құралдармен қамтылған, бұл ретте республикадағы орташа көрсеткіш – 89,6%. Бұл жұмыс әлі де жалғасады.
Халықтың қозғалысы шектеулі топтары үшін объектілерді бейімдеу жұмыстары жандандырылуда. 2027 жылға дейін облыста 1118 нысанды бейімдеу жоспарланған. Биыл бюджеттен осы мақсатқа 477,4 млн. теңге бөлінді, 168 нысан бейімделді, келесі жылы тағы да сонша нысан бейімделеді. Сонымен қатар қолжетімділік нормалары мен ережелері дүкендердің, дәріханалардың, кафелердің және т. б. жеке нысандардың өкілдеріне түсіндірілді.
Инватаксиге келетін болсақ, биыл жергілікті бюджет есебінен 11 жаңа инватакси сатып алуға 290 млн. теңге бөлінді. Олар өңірдің аудандары мен қалаларына берілді. Жабдықталған үш автокөлікті демеушілік көмек ретінде «Samruk-Kazyna Trust» корпоративтік қоры облысқа алып берді. Соның нәтижесінде өңірде инватакси арнайы көліктерінің саны бір жылда 2 есеге жуық өсіп, 20-дан 36-ға дейін жетті. «Инватакси» қызметімен І топтағы мүгедектігі бар 1,8 мың адам қамтылған.
- Қазір облыста мүгедектігі бар адамдарды қолдауда көп жұмыстар атқарылып жатыр. Мысалы, бізде алғаш рет биыл аутизмі бар балаларға арналған орталық ашылды. Мұндай орталық бұрын болған жоқ. Тағы екі оңалту орталығы ашылды, инватакси қызметі жұмыс істеп тұр. Облыс басшылығымен бірлесіп, ортақ идеяларымызды жүзеге асырсақ дейміз, әзірге оларды айтпай қоя тұрайын. Келесі жылы бастайтын жобаларымыз бар. Әрине, көп нәрсе жасалды, бірақ әлі де белсенді жұмыс атқаруымыз керек. Әзірге аймақта 18 жастан асқан адамдарға арналған оңалту орталығы жоқ. Мүгедектігі бар адамдардың, әсіресе естімейтін адамдардың жұмысқа орналасуы қиын, ал олардың жәрдемақысы негізінен коммуналдық қызметтер мен тамақтан аспайды. Осы және басқа да өзекті мәселелерді біз бүгін облыс әкімімен бірге талқыладық. Өңірде межеленіп отырған алдағы жоспарлар бізді қуантты. Мүгедектігі бар адамдардың өмірін жақсартуға арналған бағдарламалар тағы да болады деп үміттенеміз, - деді «Ерлік» қимыл-қозғалысы кем мүгедектер қоғамдық бірлестігінің төрайымы, Талдықорған қалалық мәслихатының депутаты Роза Ақжаркенова.
Жалпы облыста мүгедектігі бар адамдарды оңалтуға 2022 жылы 3,8 млрд.теңге, 2023 жылы 4,1 млрд. теңге бөлінді. Ал 2024 жылы 4,3 млрд.теңге бағытталады деп жоспарланып отыр.
Суретті түсірген Жеңіс Ысқабай
