Қазақстанда газбен жүретін көліктерге арнайы белгі жапсыру міндеттеледі

Уақыты: 27.11.2023
Оқылды: 652
Бөлім: ҚҰҚЫҚ-ЗАҢ

Қазақстанда газ баллонымен жүретін автомобильдер арнайы белгі орнатуға міндетті болады, деп хабарлайды Kazinform.

Сауда және интеграция министрлігі Техникалық реттеу және метрология комитеті төрағасының 2023 жылғы 24 қарашадағы № 466-нк бұйрығымен ҚазСтандарт әзірлеген ҚР СТ 1412-2017 «Жол қозғалысын реттеудің техникалық құралдары. Қолдану қағидалары» ұлттық стандартына толықтырулар жасалды. Өзгерістер 2024 жылдың 1 қаңтарынан қолданысқа енгізіледі. Осы стандарт міндетті орындауға жатады. Өйткені ол Қазақстан Республикасы Ішкі істер министрінің 2023 жылғы 30 маусымдағы № 534 бұйрығымен бекітілген Жол қозғалысы қағидаларында көрсетілген.

«Автокөліктерге газ қондырғысын орнатуда кейде тиісті қауіпсіздік талаптары орындалмай жатады. Мұндай көліктер адамдарға қауіпті болуы мүмкін. Осыған байланысты газ орнатылған автокөліктердің жабық тұрақтарға кіруіне тыйым салынған. Дәл осындай автомобильдерді анықтап, сәйкестендіру және мұндай тыйымдарды әкімшілендіру үшін арнайы белгі енгізілді», - дейді Техникалық реттеу және метрология комитетінің төрағасы Қуаныш Елікбаев.

Аталған өзгеріс газ баллонды жабдығы бар автомобильдерге арнайы белгіні міндетті түрде орналастыруды қарастырып отыр. Бұл таңбада «GAS» деген жазу мен леп белгісі бар сары түсті теңбүйірлі үшбұрыш бейнеленген. Бұл белгі жабық паркингтерге кірген кезде көлік оңай танылатындай етіп орнатылуы тиіс.

Фото: Сауда және интеграция министрлігі