Нәпсіден асқан жау бар ма пенде баласы үшін? Құмарлықтың құрығына іліндің екен, құрдымға қарай тартады да кетеді. Жүрегің қаламаған дүниені нәпсің тіленіп тұрған соң қашып құтыла алмай, құл болып жетегінде жүргенің жүрген. Мына жарық дүниеде тәніңді ләззатқа бөлегенімен мәңгі өмірде тамұқ әлеміне жетелеп, тозақтың отына шыжғырып, азаптың ең ауырына апаратын кесапатты кеселдің бірі – ЗИНАҚОРЛЫҚ. Дәл осы қорлықтан қорықпаған адам түбінде қор болады. Бұл мен ашқан жаңалық емес, қасиетті кітабымыз Құранда айтылған Құдайдың ескертуі һәм уәдесі.
Бірден айтайын, діндарсынып отырған жоқпын, Аллаға шүкір, кешегі кеңестік идеологияның «Дін – апиын, Құдай жоқ, Құран жалған» деген кері саясаты келмеске кеткен. Тәуелсіздігіміздің арайлы таңымен бірге асыл дініміз оралып, ақиқатқа көз жеткізе алатындай сенім мен Құранның Жаратушы иеміздің тарапынан келген қасиетті кітап екенін мойындап, тәпсірлей алмасақ та, тәптіштеп оқып, көңілімізге тоқып алатындай біліміміз бар. Ендеше қасиетті кітабымызда Алла не бұйырады зер салып көріңіз. Исра сүресінің отыз екінші аятында: «Зинаға тіпті жоламаңдар. Өйткені ол – барып тұрған азғындық, (кісіні тозаққа сүйрейтін) жаман жол!», – деп қатаң ескертеді. Бұл ұлы Раббымыздың махаббатпен жаратқан пендесіне деген мейірімінің шексіздігі емес пе? «Зина жасамаңдар» деп жұмсақтап айтпайды, керісінше «жоламаңдар!» деп бұйырады. Олай болса, қазіргі таңда адамзат қауымында зинаның қалыпты жағдайдағы әрекетке айналып кетуіне не себеп? Анасын аялауды ұмытпаған, қарындасына қамқор болуды парызындай көрген қазақ жұрты бұл кеселді неге әдетке айналдырып алды? Оның бір ғана жауабы бар. Ол – Абай атам айтқан: «Құдайдан қорықпау мен пендеден ұялмаудың» салдары. Әрі Құран кәрімді дүниеден өткен адамның рухына арналып, өліге ғана оқылатын сөз ретінде сезінуімізде. Мұқағали ақын айтқандай, «дін – ғылымның анасы» деп қабылдай алмай, оның әрбір аяты он сегіз мың ғаламның жайдан-жай жаратылмағандығы мен Алла тағаланың адамзат баласын жаратудағы мақсатын толықтай түсінбеуімізде. Бүгінгі дамыған замандағы ғылым ашып жатқан жаңалықтың осы Құранда айтылып қойғандығын оқып, көңілімізге тоқып, соған лайық амал істей алмауымызда. Адамзатты аздырып жатқан күллі жамандықтың лағынеті шайтанның азғыруы екенін, ібіліске ілескеннің екі дүниелік ісінің оңбайтыны жайлы айтылғанына зер салмауымызда. «Құдай өзі кешіреді» деген шайтанның оң жамбасқа салып, алып ұрған айласына сеніп, ойына келгенін жасап жүрген пенде аз ба мына қоғамда? Зинақорлықтың сондай қорлық екенін Алла тағала бір-ақ жерде айтпайды. Басқа сүрелерде де анық ескертеді және зина жасаушылардың шариғаттағы үкімі қандай екенін де жеткізеді. Маған сенбесеңіз, дәретіңізді алып, Құран кәрімді қолыңызға ұстап, Нұр сүресінің екінші аятын оқып көріңіз. Онда былай делінген: «Зина қылушы әйел және зина қылушы еркек – олардың әрбірін жүз дүреден ұрыңдар. Егер сендер Аллаға және ақырет күніне иман келтірген болсаңдар, Алланың бұл үкіміне, яғни зина қылушыларды дүрелеуде оларға рақым ету сезімдері ұстамасын. Олардың азапталуына бір топ момындар куә болсын», – деп анық айтылған. Бір сәттік құмарлыққа құл болып, Алла алдындағы азаптан қорықпай зинақорлықты әдетке айналдырып алған әй, пенде, әлі де кеш емес, опық жемей тұрғанда ойланып, тәубеңе келіп үлгер. Қамшы сабындай қысқа ғана мына жалғанды өтпестей көріп, «оралыңның барында ойна да күлге салып», құдайдың әмірі болған құлшылық әдіре қалып, тіршіліктің қызығына алданып, тойымсыз нәпсінің жетегінде кетіп бара жатқан қаншама жан бар? Тіпті, өмірдің мәнін тойлау мен ойнаудың (зинадан) арасынан іздейтіндер де аз кездеспейді. Олар үшін маңдайға жазылған бір ғана өмірдің құны мен қадір-қасиеті осы бір қасиетсіз қылыққа байланып тұрғандай. Жол көрсетер деген аға буынның көбінің жөні осы болса, соңынан ерген жеткіншек адаспай қайтсін?! Тар маңдайын тасқа соғып, тағдыры жар шетіне барып, құлаудың алдында тұрғанда жанашырлық танытқанымыздан не қайыр? Алдыңғы толқынның жас иіске мастанып, анаға құрмет, қарындасқа қамқорлық, әпкеге жанашырлық сезімі жоғалған жерде, немересіндей қызды құшағына қысқанды қызық көріп, ар-ұяты тоналған кезде сенерің қайсы, сүйенерің кім болмақ?! Әуреті ашық қыз көрсе ұры мысықтың көзіндей жылтыңдап шыға келетін алдыңғы арба осындай жол көрсетсе, кейінгілердің доңғалағы да сол сүрлеуге түспесіне кім кепіл?! Соның нәтижесінде ойнастықты қалыпты ойынға айналдырып, от басып, опық жеп жатқан жастар қаншама?! Көзіміз көр, көкірегіміз соқыр болмаса оған дәлел шаш етектен. Жаратқан нәсіп еткен мынау жарық дүниенің есігін перзентханадан ашатын бейкүнә сәбилердің мекені соңғы кезде дәретхана болып бара жатқаны ащы шындық! Қорапқа салып, қоқысқа тастай салу да қалыпты әдетке айналып барады. Алла тағала бізді ақыл иесі етіп, күллі жаратылыстың алдында мәртебемізді өсіріп қойса да, хайуаннан жаман қатыгез болып барамыз. Балиғаттан жасы асып, аумалы кезеңге бой алдырып, он сегіздің отына күйіп кетті дейтін емес, мектеп қабырғасынан шықпай жатып, етегі ерте түріліп, балалықтың дәмі кетпей, өмірінің мәнін жоғалтқандарға, жасы жетпей арын тоналтқандарға кім кінәлі?! Әрине, аға буын сіз бен біздің айыбымыздан. Осы орайда ұстаз-имамның мына бір айтқан оқиғасы еріксіз еске оралады. Имам айтады: «Мені бір асқа шақырды. Ана жерде небір марқасқа жігіттер отыр. Құлағы сынған, мұрны қисайған. Құран оқылып, ас ішіліп жатқанда әлгілердің біреуі мені сынағандай болып: – Молдеке, жесір әйелге барған сауап па? – деді. Мен: – Өте үлкен сауап, – дедім. Ертең әкең өліп, шешең жесір қалады үйіңнің бір бұрышынан есік ашып сауап алам дегендерің келіңдер деп жазып қой. Мынадан сауапқа батасың, – дедім. Әлгі жігіт атып тұрып, маған пистолетін тақады. Мен оған: – Сен ата алмайсың, – дедім. Өйткені сенде намыс жоқ. Сен жесір әйел дегенде кімді көз қылып тұрсың?! Әкең өліп – анаң жесір қалмай ма?! Ағаң өліп – жеңгең, жездең өліп әпкең жесір қалмай ма?! Күйеубалаң өліп, қарындасың мен қызың жесір қалмай ма?! Сонда жесір деп кімді көзге алып отырсың, – дедім. Ол кезде мен тура жиырма жаста едім», – деген уағызы кім-кімді болса да бейжай қалдырмайтыны шындық. Балуандай мығым денелі келбетіне қарап, имамның сол сөзді айтқанына күмәнсіз сенесің. Қазірдің өзінде жаттығу залынан шықпайтын оның жиырма жасында қайраты қара тасты үгітіп, мұз шайнап, су бүріккен жігіт болғанына иланасың. Бұл әулетімен имандылықтың бастауынан нәр алған, тәуелсіздіктің алғашқы жылы елімізде тұңғыш медресе ашып, бүгінгі таңда қазақтың бес жүздей ұл мен қызын тегін оқытып келе жатқан Оңтүстік Қазақстандағы «Сарыағаш» медресесінің ұстазы, әйгілі Смановтардың бір перзенті, дінтанушы, имам-ұстаз, бес жасынан Құран үйренген Әбдіғаппар Сманов еді. Орайы келген соң айтып жатқаным ғой. Әйтпесе, менің мақсатым имамды жұртқа таныстырып, атағын әспеттеп, атын шығару емес, жоғарыда сұрақ қойған жігітке берген жауабын айту ғана. Өйткені, дәл осы «жесір әйелге барса сауап» дегенді желеу етіп, өзінің жамандық жолда жүргенін жасырып, ақталғысы келетіндер қаншама?! «Жесір әйел де адам ғой. Оның да тәні қалайды. Бұл адам табиғатына сай болғандықтан дұрыс деп ойлаймын», – деп ақыл айтқан бір танысым. Жаның ашып бара ма, отбасыңнан жасырып, ойнастық жасап, жарыңның алдында өтірікші, Алла алдында күнаһар болғанша, шариғат талабына сай екінші, үшінші жар етіп ал. Былайғы уақытта басыңнан сөз асырғың келмегенімен дәл осы тәуекелге келгенде бәйбішеңе сөзің өтпей, өз үйіңе өзің ұры болып өмір сүргеннің несі қызық. Ал бойдақ жігіттердің әрекеті бассыздықпен жасап жүрген күнәсіне Алла алдына барғанда басымен жауап беретінін білмеуде. Яғни, Алланың тыйымы мен бұйрығы жазылған Құран кәрімнің бетін ашып көрмеуде. Аптасына барған жұма намазда осындай уағыз айтылса оған иланып, сенбеуінде. Нәтижесінде бойдақ кезінде қанына сіңген жаман әдет отбасын құрғаннан кейін де сол әрекетінен құр қалдырмай, жетелеп әкетуінде. Ойланайық, ағайын! «Ел болам десең, бесігіңді түзе», – деген елдің ұрпағымыз. Бүгінгі қоғамдағы басқа-басқа, дәл осы зинақорлықтың салдарынан болып жатқан берекесіздіктің бастауы сол бесіктен басталатын тәрбиеге бейжай қарағандығымыздан. Ұлымыз азса, ұрпағымыздың рухани тоналатынын, қызымыз азса, ұлтымыздың жоғалатынын ұмытпайық! «Тегіңді сақтаймын десең ұлыңды тәрбиеле, ұлтыңды сақтаймын десең, қызыңды тәрбиеле» дегенді естен шығармайық, ағайын! Құмарлықтың құрығынан құтыла алмай жүрсіз бе, бір сәт Құдайдан шын қорқып, пендеден шын ұялып көріңізші. Бәрін қоюға болады. Бүгінге дейін жасаған қателігің үшін тәубеге келіп, Алладан кешірім сұрасаң мейірімі мен рахметі мол Жаратушы иеміз бәрін кешіреді. Өйткені, жасаған қателігін түсініп, Раббысынан кешірім сұраған пендесін Алланың кешіремін деген уәдесі бар. Сенбесеңіз Құран кәрімді қолыңызға алып, Фурқан сүресінің жетпісінші аятын мұқият оқып шығыңыз. Онда былай делінген: «Ал кімде-кім өкініш білдіріп, тәубеге келсе әрі иман етіп, (өзін һәм қоғамды түзетуге бағытталған) игі істер істесе, оның жөні бөлек. Алла ондай жандардың жамандықтарын жақсылыққа (күнәларын сауапқа) айналдырады. Алла өте кешірімді, (әсіресе, тәуба етіп, Өзіне біржола бетбұрған құлдарына) ерекше мейірімді». Ендеше Алланың мейірімінен үміт үзбей, Құдайдан қорқа, пендеден ұяла өмір сүрейік. Жарай ма?
Жұматай ӘМІРЕЕВ.