Оқи отырыңыз
Бейсен Құранбек атындағы Журналистер үйінде «Жетісу облысында қызылша, ЖРВИ, тұмау және коронавирустық инфекциялардың эпидемиологиялық жағдайы» атты брифинг ұйымдастырылды. Спикер Жетісу облысы санитарлық-эпидемиологиялық бақылау департаментінің басшысы Асхат Чарапиев.
Облыста қызылшамен сырқаттанушылық тұрақталып келеді. Былтырғы қараша айында 144, желтоқсанда 218 жағдай тіркелді. Жыл басынан бері 156 адам ем алуда. Қазіргі таңда алғашқы нақтамамен 1122 жағдай тіркеліп, оның 797-і расталды. Балалардың қызылша жұқпасымен сырқаттануы қараша айының соңындағы жағдаймен салыстырғанда біршама төмендеп отыр. Иммундық статустар бойынша қызылшамен ауырғандардың көбі егілмеген.
«Облыс бойынша расталған жағдайлардың 79,4% бұрын қызылшаға қарсы вакцина алмаған. Сырқаттанушылық облыстың барлық аумақтарында тіркелді. Қызылша сырқаттанушылығын төмендету мақсатында бірқатар шаралар атқарылуда», – дейді Асхат Сәкенұлы.
– 1 және 6 жастағы балалар жоспарлы түрде қызылшаға қарсы егіледі. Мысалы, 2023 жылы 1 жастағы 12217 бала егіліп, 6 жастағы 12321 бала қамтылды. 18 жасқа дейінгі қызылшаға қарсы егілмегендердің иммундық мәртебесіне ревизия ұйымдастырылып, екпе жұмыстары жүргізілуде. Сондай-ақ, иммундық мәртебесі белгісіз және бұрын екпе алмаған 8527 адам егілді. Жұқпа ошақтарында басқалармен қатынаста болған 127567 адам анықталды. Эпидемиологиялық көрсеткіш бойынша егілуге жататын адам саны 3497, егілгені – 2075, 1422 адам иммундаумен қамтылған жоқ. Себебі, 245 адамға медициналық шектеу қойылған, 1177 адам екпеден бас тартқан. Қазіргі кезде бұрын екпе алмаған балалар, медициналық шектеулері болғандармен және вакцинадан бас тартқандармен жұмыс жүргізіліп жатыр. Қызылша бойынша жағдай тұрақты бақылауда, эпидемияға қарсы шаралар жалғасып жатыр.
Облыста коронавирустық инфекцияның эпидемиологиялық ахуалы тұрақты. 2024 жылдың қаңтар айында КВИ-дің зертханалық расталған 2 жағдайы тіркелген. Тұмау жұқпасының 129 жағдайы анықталды. Осы инфекциялардың барлығы ауа тамшылар жолымен таралатындықтан бетперде қолданған дұрыс. Бұл жөнінде 2024 жылдың 8 ақпанында Бас мемлекеттік санитарлық дәрігердің №2 қаулысы шықты. Тұрғындар арасында ауа тамшы жолы арқылы берілетін инфекциялық қызылша, COVID-19, тұмау және басқа да жіті респираторлық вирустық инфекциялардың таралуының алдын алу мақсатында медициналық ұйымдарда пациенттер мен келушілер маска киюі тиіс. Сонымен қатар, адам көп шоғырланған жерлерде бетперде кию ұсынылады. Дәрігерлер жергілікті атқарушы орган, орталық мемлекеттік орган, меншік нысанына қарамастан жеке және заңды тұлғаларға халықтың көп жиналатын әуежай, теміржол вокзалдары, автовокзал, базар, ойын-сауық орталықтары, сауда үйлері, театр, кинотеатр, ХҚКО, банктер және тағы басқа қоғамдық көлік, әуе, теміржол көлігіне мінгенде медициналық немесе матадан тігілген маскаларды пайдалануды ұсынады.
Спикер сөзінің қорытындысында кәсіпкерлік субъектілеріне шектеу шаралары қойылмағанын, ковид бойынша жағдайдың тұрақты екенін ескерте келіп, алаңдауға негіз жоқ екенін айтты.
Фото: kstnews.kz
