Оқи отырыңыз
Жетісу облысында «league jetisu» жобасы аясында футбол федерациялары президентіне сайлау жарияланады.
Мемлекет басшысы 2021 жылғы 1 қыркүйектегі Жолдауында спорттық инфрақұрылымды кезең-кезеңімен салу арқылы бұқаралық спортпен айналысу үшін жағдай жасаудың маңыздылығына тоқталған болатын. Сол себепті де, саламатты өмір салтын мемлекеттік саясаттың бір бағыты ретінде жаппай насихаттау алға қойған стратегиялық мақсаттарымызға жету жолындағы басым бағыттардың бірі саналуы тиіс.
Осы орайда, өңірде Жетісу облысы әкімінің қадағалауымен облыстың барлық аудан-қалалары, ауылдық окрутерінде жастар арасында бұқаралық спорт түрлерін қамтитын «League Jetisu» атты ауқымды жоба қолға алынуда. Ендігі мақсат, төрешілер және жаттықтырушылармен тығыз жұмыс жасай отырып, жастардың қызығушылығын арттыру мақсатында әр аудан-қалада, ауылдық округтерде осы федерациялар жұмысын жүйелеп отыратын президенттерді тағайындау болып отыр.
12 наурыз күні футбол бағыты бойынша лига президенттерінің іріктеуі өткізілетін болады. Сайлау дәл осы күні облыстағы барлық аудан/қалалар, ауылдық округтерде өткізу жоспарланған.
Іріктеуді арнайы құрылған комиссия жүргізеді. Сол өңірдің әкімі комиссияға төрағалық етеді. Федерация президентіне әр округ, ауданның тұрғыны, қоғамдық өміріне белсене араласатын кәсіпкерлері үміткер бола алады. Тағайындалған тұлғалар сол аудан-қала, ауылдық округ әкімінің кеңесшісі лауазымына ұсынылады.
Федерация Президенттері тағайындалғаннан кейін облыстың 8 ауданы, 2 қаласында және барлық 115 ауылдық округтерінде үгіт-насихат жұмыстары қарқынды түрде жүргізіліп отырады. Төрешілерді реттік жүйе жіктеуі бойынша оқыту курстары жүргізіліп, Талдықорған қаласында барлық жаттықтырушылармен семинар-тренингтер өтеді.
Толық ақпарат алу үшін жергілікті жастар ресурстық орталығына жүгінсеңіздер болады.
"ЖЕТІСУ" АҚПАРАТ
