Ағымдағы жылдың 10 қыркүйегінде Елордадағы облысымыздың мәдениет күндері аясында ауылшаруашылық тауар өндірушілерінің қатысуымен ауылшаруашылығы жәрмеңкесі өтпекші. Жетісулық кәсіпкерлер сауда өнімдерін сатуға сақадай сай. Барлық тауар тексерістен өтіп, жолға шығуға дайын тұр. Бұл маңызды жәрмеңкенің жай-жапсарын өңірлік коммуникациялар қызметінде қонақта болған облыстық ауылшаруашылық басқармасының бөлім басшысы Талғат Алыбаев айтып өтті.
Облысымыздағы ауылшаруашылық өнімдерін өндірушілер Астанаға барлығы 340 тоннадан астам өнім апармақшы. Елордадағы Оқушылар сарайының алдында өтетін жәрмеңкеге аймақтың жеміс-жидегі, еті мен балық өнімдері, кондитерлік тағамдар, сонымен қатар ұлттық тағам түрлері тартылмақ. Биылғы жәрмеңке облысымыздың Елордадағы мәдениет күндеріне орай, сондай-ақ азық-түлік бағасын тұрақтандыру, бағаның негізсіз өсуіне жол бермеу және азық-түлік қауіпсіздігін қамтамасыз ету мақсатында ұйымдастырылып отыр. Өңірімізден 16 аудан, 3 қала және «Жетісу» ӘКК» ҰК» АҚ-ы қатысады. Бекітілген сызба бойынша шатырлар мен аркаларды орналастыруға әр ауданға, қалаға ұзындығы 16 метрден орын беріледі. Алматы облысы дегенде қант пен жергілікті апорт алмасына сұраныс көп көрінеді. Сол себепті биылғы жәрмеңкеде осы тауар түрлері молынан сатылмақшы. Мәселен, жалпы саны 100 тонна көкөніс болса, оның 30-дан астамы алма түрлері екен. Астаналықтар үшін сыйлыққа апаратын 2 тонна апорт бұл тізімге кірмейді. Сондай-ақ, Алакөлден келетін балық өнімдерін де солтүстік шаһар тұрғындары тамсана қабылдайды екен. Жалпы айтқанда, астаналықтар ауылшаруашылығы өнімдерінің 38-ден астам түрімен қамтамасыз етіледі. Жетісулықтар үшін барлығы 160 млн. теңгеге сауда жасау жоспарға қойылып отыр. Сату бағалары қаладағы бөлшек сауда құнынан 15-20 пайызға төмен. Саудаға түсетін әр өнімнің санитарлық-эпидемиологиялық және ветеринарлық сапасына бақылау қойылған.
Құралбек СӘБИТОВ