Алматы облысының қоғамдық-саяси, әлеуметтік-экономикалық газеті

АРАЛАС МЕКТЕПТЕГІ ТІЛ ЖАЙЫ

Уақыты: 06.08.2019
Оқылды: 196
Бөлім: РУХАНИЯТ

Ана тілі – қай халықтың болсын жан дүниесінің айнасы, мәңгі құламайтын бәйтерегі, ұрпақтан ұрпаққа жалғасып келе жатқан асыл қазынасы. Биылғы қыркүйек айында қазақ тілінің мемлекеттік тіл дәрежесін иеленгеніне 30 жыл толады. Мемлекеттік мәртебеге ие болған қазақ тілін өз тұғырына қондырып, оның қолданылу аясын кеңейту мақсатында түрлі бағдарламалар қабылданып, жүзеге асып жатқаны белгілі. 
Мемлекеттік тілді дамыту мен оның аясын кеңейту бағытында Зәмзәгүл Төлендина басшылық жасайтын Қапшағай қалалық №4 орта мектебінде де бірқатар шара қолға алынып, жүйелі жұмыстар атқарылуда.
Солардың бірқатарына тоқталар болсақ, білім ордасында мектептің кіріс-шығыс іс қағаздары, педагогикалық кеңестің, директор жанындағы отырыстың, ата-аналар жиналысының хаттамалары, семинарлар, баяндау хаттар, анықтамалар, мәліметтер, сыныптан тыс іс-шаралар мемлекеттік тілде жүргізіледі. Акциялар мен жобаларды ұйымдастыру және өткізу кезінде мемлекеттік тілді насихаттау, қазақ әліпбиін латын графикасына көшіру, ілеспе аударманы оқыту, тіл мәдениетін жетілдіру жұмыстары да  жолға қойылған.  Сондай-ақ, оқу ордасында мемлекеттік тілдің қолданылу аясын кеңейту мақсатында әр аптаның сәрсенбі күндері «Мемлекеттік тіл – менің тілім»  деген тақырыпта мектепішілік шара өтіп тұратындығын және бұл күні мектептің барша қызметкерлері мемлекеттік тілде ғана сөйлейтінін айтпай кетпеске болмас.
Мектеп ұжымы тарапынан мемлекеттік тілді оқыту үрдісі мен мәртебесін арттыру жолға қойылған. Тіл мамандарының кәсіби білімдерін жетілдіру курстарына мұғалімдер жіберіліп тұрады. Мектеп көлемінде өткізілетін іс-шараларда мемлекеттік тіл кеңінен қолданылуда. 
– Мектебіміздегі қазақ тілі кабинеттері үнемі жаңартылып тұрады. Сабақта ұстаздар керекті көрнекіліктер қолданады. Білім ұясында өзге ұлт өкілдеріне арналған «Қазақ тілін үйренейік!» үйірмесі бар. Оның «Бастапқы», «Жалғастырушы», «Тереңдетілген» деген топтары тұрақты түрде жұмыс істеуде. Ол топтарға тағайындалған жауапты ұстаздар өз міндеттерін мінсіз атқарып келеді. Бұл үйірме қазақ тіліне тән дыбыстардың айтылуы мен жазылуына ерекше мән беріп, ауызекі тілде жатық сөйлеу, қазіргі заманға сай қазақ тілін өз деңгейінде меңгерген сауатты да салауатты тұлға қалыптастыру мақсатын алдына қойып отырған «Бастауыш» тобын Эл­мира Утембаева жүргізеді. Үйренгенін әрі қарай дамытып, күрделі сөйлемдер құрай алу мен қазақ тілінің иірімі терең, шұрайлы сөздердің қалай туатынына мән бере отырып, қазақ халқының шешендік, ақын-жыраулық мәдениетінің әліппесімен таныстыру бағытын ұстанған «Жалғастырушы» тобына дәріс беру міндетін А. Нұрымбетова өз мойнына алған. Қазақ тілінде еркін сөйлеп, оның ерекшелігін ескере отырып, өз бетінше шағын шығарма жаза алатын деңгейге көтеру міндетін алдына қойып отырған «Тереңдетілген» тобына Ардақ Төлегенова жетекшілік жасайды, – дейді мектеп директорының тәрбие ісі жөніндегі орынбасары Фарида Төлепова.
Мемлекеттік және орыс тілдерінде білім беретін бұл аралас мектепте өткен оқу жылында үш тұғырлы тілдер апталығы, соның шеңберінде достық фестивалі мен қазақ тілі мен әдебиеті әдістемелік бірлестігі ұстаздарының ұйымдастыруымен қазақ тілі мен әдебиетінің апталығы болып өтті. Ондағы сыныптан тыс түрлі іс-шаралардың жоғары деңгейде өтуіне барлық сынып оқушыларымен қатар ата-аналар да белсене атсалысты. Ашық сабақтарды пән мұғалімдері бүгінгі күн талаптарына сай оқытудың жаңа технологиялары мен интерактивті тақтаны пайдалану арқылы тартымды да нәтижелі өткізіп, өздерінің біліктіліктерін паш етті.
Бұл мектептегі мемлекеттік тілді дамыту мен оның қолданылу аясын кеңейту бағытында істеліп жатқан жұмыстардың бір парасы ғана. Бұл іс алдағы оқу жылында да сәтті жалғаса бермек.

Айжарық  КӨПТІЛЕУОВ
Қапшағай қаласы
Сурет ғаламтордан алынды