Биылғы қысқа дайындық қалай басталды? Бұл туралы аудандық тұрмыстық коммуналдық шаруашылық бөлімінің басшысы Арғын Саурықовтан сұрадық.

Ауданда 42 мектеп, 5 балабақша сұйық, 7 мектеп, 6 балабақша қатты отынмен, 1 мектеп, 1 балабақша орталықтандырылған қазандықтан жылытылады. Осы мекемелерге қажет дизель мен қатты отын толық жеткізілді. Мектептерді қатты отынмен қамтамасыз ету мемлекеттік сатып алу келісім-шарты бойынша «ZZZAccounting» жеке кәсіпорынына жүктелген. Сұйық отынға арналған пештерге сервистік қызмет көрсетуге тендерді ұтып алған кәсіпорын өкілдерімен келісім жасалып, олар жылыту маусымына дейін 50 білім беру мекемесі, 13 мемлекеттік балабақшаның пештерін тексеріп, тазартып, жөндеген. Өткен қыста ақау шыққан пештерді ретке келтіріп, іске қосуды аталған компания атқарған.

Тұрғындар үшін қатты отынның қажетті мөлшері 52,0 мың тонна. Бүгінде тұрғындарға 28 561 тонна көмір әкелінді. Тапсырыс берілген қатты отын күнделікті тасымалдануда. Аудан аумағында Алтынкөл және Құндызды станцияларындағы темір жол тұйықтарында тұрғындарға көмірдің (шұбаркөл) тоннасы 18 800-18 850 теңгеден сатылуда. Тұрғындарға қысқа дайындықты күшейтіп, ауа-райының қолайлы сәтінде қатты отынды сатып алу қажет. Осы бойынша жұмыстар ұйымдастырылып, хабарламалар таратылып, халыққа түсіндірілді. Әлеуметтік нысандарға қажет сұйық отынның қазір 80,7% тиісті мекемелерге жеткізілді.

Білім беру нысандары 1 479 158 литр сұйық отынмен толық қамтылды. Денсаулық сақтау нысандары 463 мың литрдің 243 мың литрін алды. Мәдениет нысандары 82 076 литрдің 57 076 литр сұйық отынын қазан айының алғашқы аптасына дейін дайындап алды. Жаркент қаласындағы №1 балалар мен жасөспірімдер спорт мектебі 31 370 литр, «Мерей» оңалту орталығы КММ үшін 55 мың литр сұйық отынмен толық қамтылды. Сұйық отынмен жылытылатын Панфилов су құбыры мекемесіне қажет 951 356 литрге келісім-шарт жасалып, соның 76654 литрі берілді.

Білім беру нысандары 2815 тонна, денсаулық сақтау нысандары 436 тонна, мәдениет нысандары қажетті 174 тоннаның 60 тоннасымен, Алтыүй ауылындағы № 2 балалар мен жасөспірімдер спорт мектебі 160 тонна қатты отынмен толық қамтылды. Сол сияқты өңірдегі кітапханалар үшін 60 тонна қатты отынға келісім- шарт жасалып, қыркүйек айында толық берілді. Сондай-ақ, әлеуметтік нысандарды жылытуға 3 645 тонна қатты отын сұралып,  келісім-шарт жасалып, 95,2 пайызы тиісті мекемелерге жеткізілді.

Аудандағы жылу жүйесінің жалпы ұзындығы 2707 метр. Аталған жылу жүйесіне техникалық қорытынды алуға мемлекеттік сатып алудың электрондық порталы арқылы беріліп, мердігер мекеме биылғы маусым айында ауданның жылу жүйесіне техникалық қорытындының оң шешімі алынды. Қыркүйек айындағы тексеріс бойынша Пенжім ауылдық округіндегі 3 қазандық 2025 жылға дейін, Жаркент қаласындағы қазандықтар 2024 жылға дейін жарамды деп танылып, одан әрі тексеруден өту керек деген техникалық қорытынды алынды.

М. МАНАПҰЛЫ
Панфилов ауданы
Фото: ашық дереккөзден