Оқи отырыңыз
«Газет – халықтың көзі, құлағы һәм тілі». Бұл ұлт ұстазы Ахмет Байтұрсын- ұлының асыл ойы, шымыр айтылған шындығы. Шындық қашанда ащы, сонысымен өміршеңдігін көрсетеді. «Өтіріктің құйрығы бір-ақ тұтам» дейді халық даналығы. Ол сол тұтам күйінде күйреп, сәт те күнелтпейді. Әлеуметтік желіде жарияланған ақпараттың бірі шындық болса, бірі өтірік болып шығып жатады. Кейде ешбір дәлелсіз, дәйексіз дүниелер жарияланады. Интернет қаншалықты қарыштап дамып, ақпарат аламанында алда келеді десек те одан ұлт руханияты жолында сан ғасырлық тарихы бар газеттің маңызы кемімейтіндігін есті жұрт ұғып қойса керек-ті.
Газетіміздің тілшілері текеліліктермен арнайы кездесті. Халықпен жүздесу ресмиліктен гөрі шынайылығы басым еркін форматта өтті. Жиын өрелі әңгімемен өрбіп, өнегелі өсиетпен өрілді. Көпшілік алдында сөз бастаған «Jetіsý» газетінің ардагер журналисі Нүсіпбай Әбдірахым 105 жылдық тарихы бар ата басылымның арғы-бергі өткенінен сыр шертті. Осыншама уақыт аралығында басылымның қол жеткізген жетістіктері мен онда қызмет еткен белгілі қаламгерлер, газет көтерген мәселелер жайында сөз қозғады.
Тілшілермен тілдесуге қаладағы қариялар мен мектеп мұғалімдері, білім ордаларындағы кітапханашылар мен олардың оқырмандары – жауқазындай жастар жиналды. Оқырмандар ойларын ортаға салып, газет жөнінде пікір алмасты.
Қалалық ардагерлер кеңесінің хатшысы, газетіміздің тұрақты оқырманы Гүлнұр Омарованың үйінде «Jetіsý»дың» 17 жылдан бергі тігіндісі сақталған екен. Айтуынша, газет тігінділері ол үшін естелік, тарихи жәдігер, керек кезінде таптырмас мағлұматтардың көзі. Бар қажетін осы басылымдардан тауып отыратынын марқая айтып, көпшілік көңілін жадыратты. Өркениетті елдің азаматтары газет оқуды күнделікті әдеттеріне айналдырғанын да тілге тиек етті.
Ашық әңгіме барысында саятшы Бүркітбай Файзоллаұлы да сөз алып, «Газет адам жанының шамшырағы» деген тәмсілді ой айтты. Жастардың шығармашылықпен айналысып, ой-өресінің биік болмағына осы басылымдардың септігі мол екенін алға тартты. Ақсақал, сондай-ақ, ұлттық құндылықтар жөнінде әңгіме қозғап, тілшілер қауымы ұлттық рухты оятатын мақалаларды көбірек қаузаса деген ұсыныс білдірді.
Кездесу аясында қала тұрғыны Ертай Тұғылбаев та өз пікірін ортаға салып, Текелі қаласының дамуына еңбегі сіңген, осы өлкеде туып-өскен азаматтар тасада қалып қалмай, газет беттерінде олардың ерен еңбегі жайындағы мақалалар жиірек жарияланса деген тілегін жеткізді.
Жылы жүзді кездесуде жастар газет тілшілеріне өздерін толғандырып жүрген сұрақтарын қойып, сөз болып отырған мәселелерге деген қызығушылықтарын танытты. Сол жастардың бірі қала тұрғыны Сабина Мадреймова сырлы сұхбат барысында Текелі жайлы өлең оқып, дүйім жұртты бір серпілтті.
Сынаптай сырғыған уақыт лезде өте шықты. Таным-түсінігі терең текеліліктермен қимай қоштасуға тура келді.
Медет ЖҰМАБАЙ
