Оқи отырыңыз
Қарасай ауданы жайлы айтқанда «Алтын Орда» сауда кешені арқылы өтетін республикалық маңызы бар даңғылға тоқтамай кету мүмкін емес. Бұл құрылыс Алматыға батыс бағыттан келіп кіретін автокөліктердің кептелісін азайтуға тиіс болатын.
Құны 11,5 млрд.теңгеге бағаланған осы маңызды жоба 2018 жылы басталып, Президенттің тікелей араласуымен әупірімдеп жүріп былтыр ғана пайдалануға берілген. Алайда, асығыс жасалған жұмыстың сапасы нашар болғандықтан, аспа жолдың асфальт жабындысы қайта жасалып жатқанына да біраз айдың жүзі болды.
Жалпы ұзындығы 3,86 шақырым ғана болатын бұл жол мемлекеттің қалтасына кәдімгідей салмақ салып кеткені түсінікті. Сегіз жолақтан он жолаққа дейін үлкейтіліп, эстакадалық жолы, «таға» типтес айналмасы, екі жаяу жүргіншілер көпірімен Ақсай өзенінің үстінен салынған көпірі бар, жалпы ұзындығы 3,86 шақырым ғана болатын бұл жол мемлекеттің қалтасына кәдімгідей салмақ салып кеткені түсінікті.
Ендігі мәселе, «Асыл Арман» тұрғынүй кешенінен Алматы бағытындағы жолға қосылатын «құбыр» типті аспалы айналма жолдың ұзаққа созылуы болып тұр. «Дәулет-Дорстрой» және «Қостанай жолдары» ЖШС жауапкершіліктеріне алған, бар-жоғы 260 метр болатын бұл жоба бүгінде мердігерін ауыстырып, жұмысы баяу болса да басталған. Мұнда құрылыс материалдарының қымбаттауына байланысты қаражат қайта есептеліп жатқан көрінеді. Әдеттегідей, бұл жерде қаржы қымқырудың сенімді тәсілі қолданылмады деп ешкім де айта алмасы анық. Бізді қазынаның миллиардтаған қаржысын желге ұшырып жатқан компаниялар неге жауапқа тартылмайтыны таңдандырады.
Осы жерде тағы бір айта кететін жайт, Алматы – Бішкек жолының үстінен салынатын жаяу жүргіншілер көпірлерінің құрылысы тым ұзаққа созылып кетіп жатыр. Жауапты тұлғалардың сөзіне сенер болсақ, мұнда да құрылыс материалдарының қымбаттап кетуі кедергі болған көрінеді. Алайда, бұл «дәстүрлі» қаражат жымқырудың тәсілі дегенге көбірек иланамыз. Осылайша Райымбек және Алмалыбақ ауылдарының тұрғындары үшін аса қажетті көпір көзге күйік болып әлі тұр.
Қарасай ауданының аумағында салынып жатқан республикалық маңыздағы жолдар мұнымен де түгесілмейді. Соның бірі – Шамалған стансасын айналып өтіп, бүгінгі кептелістерді азайтуға мүмкіндік беретін Алматы – Екатеринбург күре жолы. Бұл жоба бойынша 3 аспалы жол, 20 су өткізетін құбырлар салынуға тиіс. Жұмысы жедел жүргізілетін болса бұл ірі нысан үстіміздегі жылдың қазан айында пайдалануға берілуі керек.
2020 жылы қолға алынған Алматы қаласының үлкен айналма жолы (БАКАД) құрылысының қарқыны көңіл көншітерліктей. Қарасай, Іле, Талғар аудандарының аумағынан өтетін бұл жолдың ұзындығы – 66 шақырым. Оның ішінде 52,5 шақырымы 6 жолақты, 13,5 шақырымы 4 жолақты болмақ. Түркияның «Алсим Аларко+Макиол» және Оңтүстік Кореяның «ЭсКей Экоплант+Корея Экспрессвей Корпорэшн» компаниялары салып жатқан бұл жол келер жылы пайдалануға беріледі деп күтілуде.
Жолдар – біздің күнделікті өміріміздегі қажеттілік болумен қатар, мемлекеттің әл-ауқатын көрсететін маңызды сала. Атқарылып жатқан жұмыстар әлеуетіміздің әлді екенін аңғартса керек еді. Тек «әттеген-ай» дегізер тұстар қолбайлау болып тұр.
Қуат ҚАЙРАНБАЕВ
Алматы облысы
