Оқи отырыңыз
Еліміздің өркендеп-өскені, дамып, қанатын кеңге жайғаны келешек күніміздің жарқын болуы үшін керек. Себебі ғасырлар бойы азаттықты, мемлекеттілікті аңсаған ата-бабалардың арман-тілегі бүгін орындалып жатқанын көзіміз көріп, көңіліміз түйсініп отыр. Дәл сол секілді болашақтың баянды болмағын біз де тілейміз.
Ендеше, өзін мемлекетшіл, отаншыл санайтын әрбір азамат ұрпағының тәрбиелі болып өсуі үшін еңбектеніп, заманның ағымынан тыс қалмауы тиіс. Қазір көпшілікті 20 қарашада өтетін Президент сайлауы алаңдатып тұр. Бұл көкірек көзі ашық әр қазақстандықты толғандыратын-ақ мәселе. Әркім өзі өмір сүріп отырған ортаның ыстығына күйіп, суығына төзгенде ғана елдің өркендеуі, мемлекеттің дамуы алдыңғы орынға шығады. Немкеттілікпен алысқа бара алмасымыз анық.
Отанның отбасынан басталатынын ескерсек, әрбір үйде берілетін дұрыс тәрбие мен тәлім өскелең ұрпақтың санасын сергек, ойын ашық, таным көкжиегін кең етеді. Ол үшін әрбір ата-ана ұлы мен қызының саналы болып өсуін қадағалауы керек. Шынында әр дәуірде әділеттілік аспандаған жағдайда адамзаттың өркендеуі алға шығады. Оның мысалын көптеп келтіруге болады. Қазіргі әлемдік жұртшылықтың назары түсіп тұрған Қазақстан Республикасы осындай жаңа заманның, жаңа кезеңнің алдында тұр. Оның көркін кіргізіп, шырайын жандыру сіз бен біздің үлесімізде. Сол себепті, алдағы Президент сайлауына күллі жұртшылық асқан белсенділікпен қатысуы керек. Әйтпесе ұйқыдағы сананы оятпақ болған Алаш арыстарының ұстанымы дұрыс болғанын бүгін ұғынып жатқанымыз соның дәлелі. Ұлтымызды селт етпес ұйқыдан сақтасын, ұлағатты ұрпақ өсірудің бірден-бір жолы сергектік, екенін уақыт әлдеқашан дәлелдеген.
Президентті 7 жылдық бір мерзімге сайлаудың маңыздылығын осындайда ұғынбасақ, қашан түсінеміз?! Сондықтан құрметті оқырман, саяси белсенділік бізді биікке шығаратынын дұрыс қабылдауымыз қажет.
Шынында ғасырлар бойы қилы заман, қиын кезеңді басынан өткерген халқымызды болашаққа деген үміт, келешекке деген сенім алға құлшындырғаны жасырын емес. Сондықтан болар қой үстінде бозторғай жұмыртқалаған заманды аңсаған ақсақалды қариялар мен ақжаулықты аналардың жанашыр тілегі қиян-кескі күндерден тірі шығуға жетеледі. Жоңғар шапқыншылығы, коммунизм идеясы, ашаршылық, Бірінші, Екінші дүниежүзілік соғыстар, атом бомбасының сынағы қазақты құрта жаздады. Бірақ аман қалып, қанқасаптан тірі шықтық. Тәуелсіздіктің арқасында атымызды алты құрлық таныған елге айналдық.
Ендеше, алдағы Президент сайлауына біркісідей қатысайық! Себебі, бұл сайлау басқа сайлаудан өзгерек.
Ызғарбек Бектұрсынов,
Алматы облысының және
Ұйғыр ауданының
Құрметті азаматы
