Оқи отырыңыз
"Жетісу медиа" ақпараттық алаңында Қазақстан Республикасының Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Алматы облысы бойынша департамент басшысы Ернар Мақажановпен брифинг өткізілді. Онда сыбайлас жемқорлыққа қарсы іс-қимыл мәселелері бойынша заңнамалық өзгерістер түсіндірілді.
Брифингте Ернар Әбсейітұлы 6 қазанда Мемлекет басшысы қол қойған, Үкіметтің заң жобалау жұмыстарының 2020 жылға арналған жоспарын орындау мақсатында Сыбайлас жемқорлыққа қарсы іс-қимыл агенттігі әзірлеген Сыбайлас жемқорлыққа қарсы іс-қимыл мәселелері жөніндегі заңға енгізілген ұсыныстар жайында баяндама жасады.
Сыбайлас жемқорлыққа қарсы заңнаманы жетілдіру - Сыбайлас жемқорлыққа қарсы іс-қимыл агенттігі қызметінің маңызды және өзекті бағыттарының, сыбайлас жемқорлықты жоюдың негізгі тетіктерінің бірі. Аталған Заң шеңберінде 3 кодекс пен 10 заңға түзету енгізілген.
Атап айтқанда, Азаматтық кодексі, Қылмыстық кодексі, Қылмыстық іс жүргізу кодексі, Тұрғын үй қатынастары туралы, Ұлттық қор және мұрағаттар туралы, Құқық бұзушылық профилактикасы туралы, Құқық қорғау қызметі туралы, Мемлекеттік мүлік туралы, Ұлттық қауіпсіздік туралы, Арнаулы мемлекеттік органдар туралы, Әскери қызмет және әскери қызметшілердің мәртебесі туралы, Сыбайлас жемқорлыққа қарсы іс-қимыл туралы, ҚР Мемлекеттік қызметі туралы Заңдарға өзгерістер енгізілді.
Сыбайлас жемқорлыққа қарсы іс-қимыл мәселелері жөніндегі Заң ағымдағы жылдың 16 қазанынан бастап қолданылады. Заң Мемлекет басшысының жедел-іздестіру қызметін немесе сотқа дейінгі тергеп-тексеруді жүзеге асыратын лауазымды адамдардың арандатушылық әрекеттері үшін қатаң жауапкершілік белгілеу туралы тапсырмасын іске асыруға бағытталған.
Заң түзетулерінің бірінші блогы өзіне сыбайлас жемқорлыққа қарсы шектеулерді қабылдаған мемлекеттік қызметшілер мен өзге де адамдар үшін сыйлықтарға, материалдық сыйақыға, егер мұндай іс-әрекеттер қызметтік өкілеттіктерге кіретін болса немесе лауазымдық жағдайына байланысты оларға ықпал ете алатын болса, олардың іс-әрекеттері үшін сыйға тартушылардың пайдасына ұсынылатын қызметтерге толық тыйым салуды белгілейді.
Сыйға тартушының пайдасына жасаған әрекеттері үшін сыйлықтар беруге тыйым салынған адамдар тобын депутаттар, судьялар, саяси қызметшілер, "А" корпусының мемлекеттік қызметшілері, квазимемлекеттік сектор басшылары және олардың отбасы мүшелері кеңейтті.
Заңға сәйкес сыбайлас жемқорлыққа қарсы заңнама квазимемлекеттік сектор субъектілерінде мемлекеттік бюджеттен қаржыландырылатын жобаларды сатып алу және іске асыру бойынша негізгі шешімдер қабылдайтын тұлғаларға таратылды. Енді бұл шеңбер айтарлықтай кеңейтілді және бұл - үлкен жетістік.
Яғни, олар сыбайлас жемқорлыққа қарсы шектеулерді толық көлемде қабылдайтын болады, сондай-ақ, сыбайлас жемқорлық құқықбұзушылықтар жасалған жағдайда неғұрлым елеулі жауапкершілікке ие болады. Бұрын мұндай нормалар квазимемлекеттік компаниялардың бірінші басшыларына ғана қатысты болатын. Сондай-ақ, заңда туыстардың бір ұйымдағы бірлескен жұмысының жекелеген мәселелерін реттеуге, сыбайлас жемқорлық құқықбұзушылықтар туралы хабардар етуге, сыбайлас жемқорлыққа қарсы қызмет қызметкерлерінің тұрғын үй төлемдеріне, квазимемлекеттік сектор субъектілерінде комплаенс-қызметтер құруға бағытталған нормалар көзделген.
"ЖЕТІСУ-АҚПАРАТ"
