Оқи отырыңыз
Премьер-Министр Асқар Маминнің төрағалығымен селекторлық режимде өткен Үкімет отырысында елдегі санитарлық эпидахуал сараланды. Денсаулық сақтау министрі Алексей Цой елдегі коронавирус инфекциясымен күрес бойынша қазіргі жағдайды және қабылданып жатқан шараларды баяндады.
Министрдің айтуынша, әлемде тәулігіне 480 мыңнан астам жағдай тіркеледі. 4,4 миллионнан астам адам қайтыс болды. Жағдай әлі де күрделі. Соңғы аптада аурудың ең көп өсуі Әзербайжанда, Жапонияда, Израильде тіркеліп отыр. Ал Қазақстанда өсім бір апта ішінде 7 пайызға төмендеген. Еліміз 1 миллион тұрғынға шаққандағы әлемдік рейтингте сырқаттанушылық пен өлім-жітім саны бойынша 222 елдің ішінде 101-нші орында тұр. 24 тамыздағы жағдай бойынша Қазақстанда COVID-19-дың оң нәтижесімен 748 851 науқас және КВИ теріс нәтижесімен 67 870 жағдай тіркелген. Түркістан облысын қоспағанда барлық өңір "қызыл аймақта" тұр.
– Соңғы екі аптада елімізде коронавирус инфекциясымен сырқаттанушылық деңгейі 10 пайызға төмендеді. Емдеу мекемелерінде инфекциялық төсек-орындар толымдылығы 49, реанимациялық төсектер толымдылығы 46 пайызды көрсетті. Инфекциялық төсектердің жүктемесі 12 пайызға азайды. Инфекциялық төсек-орын толымдылығы жағынан Алматы қаласы мен Ақтөбе, Алматы облысындағы көрсеткіш жоғары. Халықты вакциналау жұмысы жалғасуда. Бүгінгі таңда вакцинаның 1-компонентін 6,5 млн.-ға жуық адам алды, ол қамтылуы тиіс халықтың 64 пайызын құрайды. 2-компонентімен 5 миллионнан астам адам егілді, ол вакцина алуға тиісті халықтың 50 пайызын қамтиды. Егу пункттерінде барлығы вакцинаның 1 млн.400 мың бірінші компоненті және 940 мың екінші компоненті бар. Оны жеткізу кестеге сәйкес жүргізіліп жатыр. Жүргізілген талдау нәтижесі КВИ ауыр өтіп жатқан науқастардың негізгі үлесін вакцина алмағандар құрап отырғанын көрсетті. Мәселен, 1 ақпаннан бастап тіркелген КВИ-мен ауырған, вакцина алмаған науқастардың салыстырмалы салмағы 97,5 пайызды құрайды, ал вакцина алған азаматтардың тек 2,5 пайызы ауырған. Реанимация мен өкпені жасанды желдету аппаратына қосылған науқастардың 95 пайызы вакцина алмаған азаматтар. Ұсынылған мәліметтер вакцинаның тиімділігін тағы дәлелдеп отыр. Осыған байланысты айтарым, осы уақытқа дейін вакцина алмаған азаматтарды дұрыс шешім қабылдап, екпе алуға шақырамын. Бұл бәрімізге өз денсаулығымызды ғана емес, жақындарымыздың да денсаулығын сақтауға мүмкіндік береді, – деді А.Цой.
Осыған орай Үкімет басшысы вакцина салдыру науқанын күшейтуді, ведомствоаралық комиссияға эпидемиологиялық жағдай жақсарып келе жатқан өңірлердегі «Ashyq» жүйесіне қатысатын бизнес субъектілері үшін демалыс күндері шектеу шараларын жеңілдету мәселесін қарастыруды тапсырды. Сондай-ақ, Үкімет отырысында ҚР 2022-2026 жылдарға арналған әлеуметтік-экономикалық даму болжамы және 2021 жылғы Қазақстан Республикасы халқының ұлттық санағына дайындық және оны өткізу мәселелері де қаралды.
Үкімет басшысы өңірлердің әкімдеріне, Ұлттық статистика бюросына және Ішкі істер, Денсаулық сақтау министрліктеріне халық санағын өткізу бойынша барлық ұйымдастырушылық мәселелерді пысықтауды тапсырды. Ақпарат және қоғамдық даму министрлігіне халық арасында ұлттық санақтың жүргізілу мақсаты мен тәртібі туралы түсіндіру жұмыстарын күшейтуді міндеттеді.
– Бұл іс-шараның әлеуметтік-экономикалық маңызы зор. Санақ нәтижесі бойынша мейлінше дәл деректер болып табылатын әрі елдегі ахуалды талдауға, болжам жасауға және тиісті шешімдер қабылдауға негіз болатын көптеген көрсеткіштер алынады. Сондықтан еліміздің әр азаматының санаққа қатысуының маңызы өте зор, – деді А.Мамин.
Жиын соңында облыс әкімі Амандық Баталов осы мәселелерге орай жауапты тұлғаларға нақты тапсырмалар беріп, жұмысты ширатуды тапсырды.
Алма ЕСЕНБАЙ
