Тіл сарайында «Даму» кәсіпкерлікті дамыту қоры облыстық инвестициялар мен кәсіпкерлікті дамыту басқармасы қызметкерлерінің, қор ұсынған консалтингтік компаниялар мен банктер өкілдерінің және кәсіпкерлердің басын қосып, Ашық есік күнін өткізді.
Бұл кәсіпкерлердің мемлекеттік қолдау шаралары мен қолданыстағы құралдарын терең түсінуіне мүмкіндік туғызды. Жиынға қатысқан «Даму» қоры басқарма төрағасының орынбасары Арсен Мұстафиннің айтуынша, Ашық есік күні елдің барлық аймағында екінші жыл қатарынан өткізілуде. Бұл ең алдымен кәсіпкерлермен тікелей кері байланыс орнатып, барынша ашық болуға, олардың сұранысын тыңдауға және бүгінде бизнесте қандай мәселелер бар, кәсіпкерлерді нендей проблемалар толғандыратынын түсінуге септігін тигізуде.
Сондықтан «Даму» қорының басшылығы мұндай іс-шараларға тікелей қатысып, кәсіпкерлерге жеке кеңес береді. Бұл кәсіпкерлердің қандай ақпаратқа мұқтаж екендігін айқындап, орын алған олқылықтардың жедел шешілуіне жол ашады. Шара барысында кәсіпкерлерге қолдау алудың өтінім беруден бастап, кейінгі мониторингке дейінгі барлық кезеңі егжей-тегжейлі түсіндірілді. Сондай-ақ қатысушыларға қолданыстағы қаржылық және қаржылық емес қолдау шаралары таныстырылып, бағдарламалар шарттарын сақтау маңыздылығы құлағдар етілді.
Қор қызметтерінің қолжетімділігін арттыруға да ерекше назар аударылды. Бірыңғай фронт-офис пен мобильді фронт-офистердің жұмысы туралы да сөз болды. Олардың көмегі арқылы шалғай ауылдардың тұрғындары мамандардан тегін кеңес алуға мүмкіндігі бар. Жиын барысында қор басшылығы кәсіпкерлерді алаяқтардан сақ болып, тексерілмеген делдалдар мен кеңесшілердің қызметіне жүгінбеуге шақырды. Соңында қатысушылар тиісті даму институтына, банкке немесе мемлекеттік орган өкілдеріне тікелей хабарласып, кеңес алды.
Ашық есік күні кәсіпкерлерге нақты жобалары бойынша жеке кеңес алып, мемлекеттік қолдау жүйесіне қатысатын ұйымдар өкілдерімен оларды талқылауға мүмкіндік берді. Мұндай формат қолжетімді құралдар туралы ақпарат алумен қатар нақты жобаны іске асыруға қай тетіктің көбірек сәйкес келетінін анықтауға көмектеседі.
Айта кетейік, «Даму» қорының Ашық есік күні барлық өңірде өтеді. Ал шалғай елді мекендердегі кәсіпкерлер үшін мобильді фронт-офистер жұмыс істейді. Олардың мамандары кеңесті тікелей кәсіпкердердің өз елді мекендерінде береді. Алдағы Ашық есік күні мен мобильді фронт-офистердің жұмыс кестесі туралы ақпарат «Даму» қорының ресми сайтында және әлеуметтік желілерінде жарияланады. Кеңес алу үшін 1408 бірыңғай байланыс орталығына да жүгінуге болады.
Айгүл Байжұмақызы
Талдықорған қаласы
