Бұл туралы 7-su.kz ақпараттық порталы Kursiv.media сілтеме жасап хабарлайды.
Ниет бар, мүмкіндік жоқ
ЮНФПА жүргізген соңғы халықаралық сауалнамаға сәйкес, перзент сүйгісі келетін адамдар көп болғанымен, олардың арманы орындала бермейді. Сауалнама 14 елде (Бразилия, Венгрия, Германия, Үндістан, Индонезия, Италия, Марокко, Мексика, Нигерия, АҚШ, Таиланд, Швеция, Оңтүстік Корея және Оңтүстік Африка) жүргізіліп, шамамен 14 мың адам қамтылған. Бұл елдерде әлем халқының үштен бір бөлігі тұрады.
Респонденттердің әрбір бесіншісі: «Бала саны қалағанымдай емес» деген жауап берген. ЮНФПА басшысы Наталия Канем бұл жағдайды «шын мәніндегі дағдарыс» деп атап отыр.
«Әлемде туу деңгейі теңдесі жоқ шамада төмендеп жатыр. Адамдардың көбі екі немесе одан да көп бала сүйгісі келеді. Бірақ олардың бұл тілегі көбіне орындалмайды. Қаржы мен уақыт жетіспеушілігі – негізгі себеп», – дейді Наталия Канем.
Қаржы – басты кедергі
Сауалнама нәтижесі көрсеткендей, респонденттердің шамамен 40%-ы бала сүюге қаржылық қиындықтар кедергі екенін айтқан. Бұл көрсеткіш Оңтүстік Кореяда – 58%, ал Швецияда – 19% деңгейінде.
Медициналық кедергілер мен бедеулік мәселесі
Таиланд (19%), АҚШ (16%), Оңтүстік Африка (15%), Нигерия (14%) және Үндістан (13%) тұрғындары көбіне медициналық кедергілер мен бедеулік проблемаларын негізгі себеп ретінде көрсеткен. ЮНФПА сарапшыларының мәліметінше, бұл мәселе жаһандық деңгейде шамамен 12%-ға жетіп отыр.
Уақыт тапшылығы – қазіргі заманның дерті
Тек қаржы ғана емес, уақыт тапшылығы да бала сүюге кедергі болып отыр. Мәселен, Мумбай қаласының тұрғыны Намрата күн сайын жұмысқа барып келуге 3 сағат уақытын жұмсайды. Жұмыстан шаршап келген соң, 5 жасар қызымен де дұрыс уақыт өткізе алмайтынын айтады.
«Мұндай өмір тәртібі отбасы мүшелеріне демалуға да мүмкіндік бермейді. Бір балаға уақыт таба алмай жүргенде, екіншісін дүниеге әкелуді кейінге қалдыруға тура келеді», – дейді ол.
ЮНФПА сарапшылары бұл үрдіс ұлттардың қартаюына, экономикалық белсенділіктің төмендеуіне және ұзақмерзімді әлеуметтік мәселелерге алып келуі мүмкін екенін ескертуде. Мамандар мемлекеттерге отбасы институтын қолдау тетіктерін күшейту, бала тәрбиесіне жағдай жасау және жастарға қолжетімді баспана мен жұмыс орындарын ұсыну бағытында нақты қадамдар жасауды ұсынады.
