Бейқамдық, қаперсіздік һәм алаңсыздық. Осы үшеуі қауіптің көлеңке зорайтуына себепкер. Қатердің қамсыз жүргенді жағалайтын әдеті. Кей ата-ана соны ескерсе. Ескертіліп жатыр. Еске де салуда. Ескерер болса.
Өмірге есеп, тұрмысқа жоспар жүрмейді. Дегенмен, тынымсыз тіршілікте бала қараусыз қалмауы тиіс. Дана бабалар «Ананың көңілі балада, баланың көңілі далада» дегенді кешегі қазаққа айтқан жоқ. Кейінгілер жадында ұстасын депті.
Дегенмен, ойын баласы от баспасын десек, төтеншеліктердің ескертпелерін жадымызда ұстау міндет. Себебі, шомылу маусымы басталғалы Жетісу облыстық төтенше жағдайлар департаменті су жағалаған әр балаға алаңдаушылық танытуда. Қайткенмен, әр балаға тек тиісті құрылым ғана емес, әрбір ата-ана да жауапты.
Шомылу маусымының басталғанына да он күннен әрі жығылыпты. Содан бері облыстық төтеншеліктер бәйек қағуда. Облыста 3 шомылу аймағы белгіленген. Талдықорған қаласындағы жағалау мен Алакөл және Балқаш көлінің жағажайы. Қауіпсіздігі айқындалған осы 3 аймақтан өзге азаматтық қорғаныс өкілдері өзен-көл жағалауын торып әлек. Өйткені көзден таса бала шомылуға бейім.
Бала бейімі бейжайлықпен қарауға болмайтын жайт. Облыстық төтенше жағдай департаментінің өкілі Азамат Какашов Талдықорған қаласындағы құтқарушылар күн сайын балаларға һәм олардың ата-аналарына түсіндірме жүргізіп жүргенін жеткізді. Шомылу маусымындағы басты ережелерді тәптіштеп ескертіп жүргенін де көрсетті.
– Жағажайда ересектерден бала көп. Ата-аналар оларды қараусыз қалдырмаса деген тілегіміз бар. Себебі, олар тек біреудің баласы емес, еліміздің келешегі. Күнделікті дағдыға сай мұнда бекітілген мамандар балаларға суға шомылудың ережесін түсіндіруде. Қауіп төніп, жүзе алмай батқан баланы құтқару тәсілдері, қауіпсіздік шаралары сол балалардың өздеріне тікелей көрсетілуде. Айта кететін жайт, құтқарушыларымыз қырағы, бірақ ата-ана қаперсіз қалмаса, – дейді А. Какашов.
Шынында құтқарушылар жағажайдағы әр балаға (бетін аулақ қылсын) суға батқан кісіні қалай жағаға шығару тәсілін үйретуде. Одан кейінгі алғашқы медициналық көмек берудің жайы да түсіндірілуде. Бәрі қимыл-әрекетпен. Төтеншеліктерден дәріс алғандардың қатарында Жалғас Есдәулетұлы да бар. Мектеп оқушысы құтқарушылардан көп нәрсе үйренгенін айтты.
– Суға шомылудың өз ережесі барын енді білудемін. Бүгін достарыммен жағажайға келгенмін. Ағалар бізге көп нәрсе үйретті. Үлкендер жақын маңда болмаса, адам құтқаруға қорықпай кірісе аламыз. Дейтұрғанмен, қауіпсіздік ережесін сақтауымыз керек, — дейді Ж. Есдәулетұлы.
Құрметті көзі қарақты оқырман, бала қауіпсіздігіне тек құзырлы органдар ғана емес, әрбір ата-ана жауапты. Сондықтан балалар қараусыз қалып, қауіпке душар болмасын. Төтеншеліктер осыны ескертеді.
Дастанбек САДЫҚ
