Жауаптылардың сөзінше, аталған төсбелгі – еңбек жетістіктері үшін берілетін Қазақстан Республикасының мемлекеттік марапаты. Бұл әр саладағы өз ісіне адал, қарапайым да қажырлы еңбекқор адамдарға деген шынайы құрметтің үлгісі. Ал, Жетісу облысының бас имамы Керімбек Сәрсенбайұлы осы құрметке әбден лайық. Өйткені, әлем елдері арасында діни экстремизм мен терроризм дерті дендеп тұрған бүгінгі таңда бейбітшілікті бекемдеп, қоғамның орнықтылығын сақтаудың маңызы зор. Сол үшін әрбір мұсылман баласының дәстүрлі ислам дініне деген көзқарасын айқындап, діни сауаттылықты арттыру ауадай қажет. Бұл, біріншіден, жастардың жат ағымның жетегінде кетуінің алдын алса, екіншіден, көпке қайырымды да қамқоршы болып, ізгі имандылыққа бет бұруына тың жол ашады. Сондықтан бас имам Керімбек Сәрсембайұлының бастамасымен бұл бағытта жасалып жұмыстар жүйелі.
– Дін – иман айнасы. Сонымен бірге дін мен дәстүр егіз ұғым. Себебі, ата-бабаларымыз ежелден осы екі құндылыққа баса мән беріп, ұрпақ тәрбиесінің ұйтқысына айналдырған. Қашан да халқымыз үшін береке-бірлік пен қайырымдылыққа бастап, ізгі имандылыққа баулитын бұл қағидалардың орны ерекше. Сол себепті дін мен салт-дәстүр сабақтастығын кеңінен дәріптеп, өскелең ұрпаққа тура жол нұсқау басты міндет. Керімбек имам сол қызметті абыроймен атқарып жүрген абзал жан. Оған қандай марапат берілсе де артық емес,– дейді аймақтағы қарт қаламгер Әли Ысқабаев.
Керімбек Сәрсембайұлы Дәуітов Жетісу облысы, Көксу ауданы, Талапты ауылында дүниеге келген. «Нұр-Мүбарак Египет Ислам мәдениеті» университетінің түлегі. «КАУ» университетінің заңгер мамандығы бойынша магистрі. Алғашқы еңбек жолын Жетісу облысы, Текелі қаласы «Керімбек би» мешітінің бас имамы болып бастаған ол Талдықорған қаласындағы орталық «Иман» мешітінде наиб имам, «Тәубе» мешітінің бас имамы сынды қызметтерді абыроймен атқарған. 2023 жылдың тамыз айында Қазақстан мұсылмандары діни басқармасының Жетісу өңірі бойынша бас имамы және облыс орталығындағы «Иман» мешітінің имамы болып тағайындалған. Дін саласы бойынша өткен бірқатар байқаулардың жеңімпазы. Әрі бірнеше мәрте облыс әкімінің арнайы Алғыс хаты және «Құрмет» грамоталарымен сыйланған. Қазір ол Текелі қаласының «Құрметті азаматы», «Еңбек даңқы» төсбелгісінің иегері.
Айдын КӘЛІМХАН
