Алакөлдік ата-әжелер үшін «Белсенді ұзақ өмір сүру» орталығы ашылды. Салтанатты шараға аудан әкімі Алмас Абдинов, облыстық жұмыспен қамтуды үйлестіру және әлеуметтік бағдарламалар басқармасының басшысы Ермек Мизамбаев, Үшарал қаласының ақсақалдары мен ақ жаулықты аналары қатысты.
Аудан әкімі Алмас Абдинов тұрғындарды құттықтап, жаңа орталықтың маңыздылығына тоқталды.
– Халықты ынтымақ пен бірлікке үндеп, дұрыс жол сілтеп, өңір дамуына да сүбелі үлес қосатын қазыналы қарияларға құрмет көрсету – азаматтық парызымыз. Мемлекет басшысының бастамасымен елімізде ардагерлерді назардан тыс қалдырмауға бағытталған ауқымды шаралар атқарылуда. Бұл орталық барлық зейнет жасындағы азаматқа түрлі қызмет көрсете алады. Сіздерді осы орталықтың жұмысына белсенді түрде қатысуға шақырамын, – деді аудан басшысы.
Ал аудандық ардагерлер кеңесінің төрағасы Сатай Бекболатов қариялар қауымының атынан алғыс білдіріп, ақ батасын берді. Шашу шашылып, орталық салтанатты түрде ашылып, жиналған көпшілік жаңа әлеуметтік нысанмен танысты.
– 2024 жылы облыс орталығы Талдықорған қаласында зейнет жасындағы жандарға арналған 250 орынды орталық ашылды. Мұнда 500 адам тіркелген. Қазіргі таңда 250 адам тегін қызмет алады. Мемлекеттік бюджеттен бөлінген қаржы тиімді пайдаланылуда. Заман талабына сай қажетті барлық құрылғы сатып алынды. Енді алакөлдік ақсақалдар мен ақ жаулықты аналарымыз келіп, қалауларына қарай уақыттарын тиімді өткізуіне толық жағдай жасалған. Биыл Көксу ауданынан да дәл осындай ғимарат ашамыз деген жоспар бар. Ал Панфилов ауданының жомарт азаматтары өз қаржыларына үлкен кісілерге арналған орталық ашты, – деді Ермек Арынханұлы.
Бұл жерге келетін жандар ағылшын тілін үйреніп, компьютерлік сауаттылық курстарынан өтіп, емдік дене шынықтырумен, денсаулыққа пайдалы массаж, фитнес, би, йогамен шұғылданып, қолөнер, бейнелеу өнері, музыка секілді шығармашылық үйірмелерге бара алады. Қарттарға психологиялық және әлеуметтік кеңес беру, танымдық дәрістер мен мотивациялық тренингтер, Ашық есік күндері мен мәдени-танымдық іс-шаралар тұрақты түрде өткізіледі. Бұл бастамалар егде жастағы жандардың жалғыздықтан арылып, қоғаммен тығыз байланыста болуына үлкен мүмкіндік береді. Әзірге мұндай орталықтар облысымыздың бірнеше ауданында жұмыс істеп тұр.
Ұлағатты ұстаз, Алакөл аудандық аналар кеңесінің төрайымы Ұлжалғас Дүйсебаева мемлекет тарапынан жасалған қамқорлыққа алғыс білдірді.
Орталықта 7 жаңа жұмыс орны ашылды. Орталық жұмысының тиімділігін арттыру үшін қосымша 2 арнайы техника қарастырылған.
Еңлік КЕНЕБАЙ
Алакөл ауданы
