«J-LEAGUE» жобасы – Мемлекет басшысы Қасым-Жомарт ТОҚАЕВТЫҢ бұқаралық спортты дамыту туралы Ұлттық құрылтайда берілген тапсырмасына сәйкес Жетісу өңірінде қолға алынған игі бастама. Бұл айтулы бастаманың ақтық кезеңі «Жетісу» стадионында өтті. Шара аясында облыстың түкпір-түкпірінен келген 90 үздік аула командаларына 2 мың доп сыйға таратылды. Салтанатты шараға облыс әкімі Бейбіт ИСАБАЕВ арнайы қатысып, жас спортшыларға сәттілік тіледі.
– «J-LEAGUE» футбол жарысы – облыс аумағында бұқаралық спортты дамытудағы іргелі жобалардың бірі. Мұндағы мақсат – ауыл балаларын қолдау, спортқа бейімдеуге басымдық беру. Осы уақытқа дейін футбол, волейбол, баскетболдан облыс көлемінде өткен іріктеу жарыстарына 887 команда, яғни 9 мыңға жуық бала қатысқанын ризашылықпен айтамыз. Ал бүгінгі «J-LEAGUE» лига» футбол жарысының ақтық сынына 90 үздік команда, 900-ге жуық жас спортшы жолдама алып отыр. Бір атап өтерлігі, күні кеше ғана 2010 жылғы жасөспірімдер арасында футболдан өткен республика чемпионатында жетісулық жас спортшылар Қазақстан чемпионы атанды. Бұл – біз үшін үлкен мақтаныш. Барлық спортшыға сәттілік тілеймін, – деп атап өтті облыс басшысы.
Салтанатты шарада таяуда түркістандық құрдастарымен финалдық кездесуде 2:1 есебімен жеңіске жетіп, Қазақстан чемпионатында 1-орын иегері атанған 2010 жылы туған ұлдар командасын марапаттау рәсімі өтті. Оларға кубок және 500 мың теңге ақшалай сертификатты аймақ басшысы өз қолымен табыстады.
Жиналған көпшілікті Қазақстан футбол федерациясының өңірлік байланыстар департаментінің директоры Марат Такенов және қоғам белсендісі, спорт жанашыры Виктор Буков құттықтап, спортшыларға жеңіс тіледі.
Жетісу облысының футболдан жасөспірімдер командасының ойыншысы Бекжан Жақсыбай 5 жылдан бері футболмен айналысады. Орталық қорғаушы ретінде ойнайтын спортшы ел чемпионатында «Үздік қорғаушы» номинациясын жеңіп алған. «Алдағы уақытта «Жетісу» командасының негізгі құрамында және ұлттық құрамада ойнағым келеді. Арманым көп. Оларға жету үшін тынбай еңбек етемін», – дейді жас спортшы.
Бұдан әрі Жетісу облысының «J-LEAGUE» жобасы аясында жасөспірімдер арасындағы футбол жарысы «Болашақ» стадионында басталды. Жас футболшылар арасындағы ақтық жарыс 14 маусымға дейін жалғасады. 3 жас ерекшелігі бойынша жеңімпаз атанған 9 команданың ойыншыларына, яғни 90 балаға жазғы демалыс лагерьлеріне тегін жолдама беріліп, спорттық киімдер мен доптар сыйға тартылады.
Еңлік КЕНЕБАЙ
