Бұл жөнінде Бейсен Құранбек атындағы Журналистер үйінде тілшілермен кездескен мүгедектерге арналған «Спорттық-сауықтыру орталығы» қоғамдық бірлестігінің төрағасы Елдос Баялышбаев, облыстық қоғамдық даму басқармасы басшысының орынбасары Тимур Губашев және «Шектеусіз демалыс» жобасының ұйымдастырушысы Азамат Оспанов «Кедергісіз болашақ – білімнен басталады» атты брифингте айтты. Жобаның «Алакөл Асар» демалыс орнында өтуінің де өзіндік себебі бар. Бұл база барлық қатысушылар үшін қолайлы және қолжетімді. Бастысы, қажетті жағдаймен қамтамасыз етілген.
– Жоба аясында бенефициар қатысады, олардың да төрт кезеңнен тұратын оқыту курстары ұйымдастырылады. Оған кемінде 80 бенефициар қатысады, олардың 70 пайызы – мүгедектігі бар тұлғалар. Әр кезең 20 адамға арналған. Оқыту мемлекеттік және ресми тілде жүргізіледі. Ал әр модульден соң міндетті тестілеу қарастырылған. Әр курстың ұзақтығы 24 академиялық сағат, – деді өз сөзінде Тимур Айбекұлы.
Жобаның негізгі мақсаты – мүгедектігі бар адамдарға арналған инклюзивті білім беру ортасын құру, қатысушылардың цифрлық сауаттылығы мен психологиялық төзімділігін арттырып, ақпараттық-коммуникациялық технологияларды пайдалану арқылы тиімді оңалтуды қамтамасыз ету.
Оқытудың 1-2-кезеңі SMM және нысаналы жарнама бойынша тренинг, 3-кезең әлеуметтік кәсіпкерлік бойынша тренинг және 4-кезеңі психологиялық қолдау және өзін-өзі көмек көрсету дағдылары бойынша семинар.
Әр кезеңде мүгедектігі бар адамдармен жұмыс істеуде тәжірибесі бар білікті жаттықтырушылар болады.
Серік ҚАНТАЙ
