Оқу-ағарту министрлігінің мәліметінше, бүгінде 105 мектептің құрылысы аяқталып, пайдалануға берілген. Қалған 112 білім беру нысаны 2025 жылдың соңына дейін толық іске қосылады. Бұл жоба еліміздің барлық өңіріндегі балаларды, тұрғылықты жеріне қарамастан, заманауи әрі сапалы білім беру ортасымен қамтуды көздейді.
Ерекше атап өтерлігі, жаңа мектептердің жартысына жуығы ауылдық жерлерде бой көтеруде. Осылайша, 200 мыңнан астам ауыл оқушысы жаңартылған стандарттарға сай білім алу мүмкіндігіне ие болды.
– Бұл жоба – елімізде орта білім сапасын арттыруға және қала мен ауыл мектептері арасындағы алшақтықты жоюға бағытталған стратегиялық бастама. Бұл – жай ғана мектеп ғимараттары емес, ұлт болашағы өсіп шығатын киелі білім ордалары. Сондықтан ұлттық жоба аясында бой көтерген білім ұйымдарын «Келешек мектептері» деп атауды ұсынамыз, – деді Оқу-ағарту министрі Ғани Бейсембаев Орталық коммуникациялар қызметінде өткен брифингте.
Заманауи стандарттарға сай инфрақұрылым
Салынған жаңа мектептер эргономика талаптарына сай жобаланып, типтік мектептерге қарағанда 15–20 пайызға кең етіп салынған. Сонымен қатар, олар техникалық жағынан 4 есе жоғары деңгейде жабдықталған. Оқу орындары қазіргі заманғы жиһаздармен, интерактивті құрылғылармен толықтай қамтамасыз етілген. Қауіпсіздік шаралары да күшейтілген: бейнебақылау, өрт дабылы, өткізу жүйелері орнатылған.
Бастауыш және жоғары сынып оқушылары үшін бөлек оқу блоктары қарастырылған, бұл білім беру процесінің тиімділігін арттырады.
Отандық өндіріске қолдау
Ұлттық жоба аясында отандық өндірісті қолдауға ерекше басымдық берілуде. Мектеп құрылысына қажетті материалдар, жабдықтар мен жиһаздар отандық өндірушілерден сатып алынуда. Бұл өз кезегінде жергілікті кәсіпорындардың дамуына және жаңа жұмыс орындарының құрылуына оң әсерін тигізіп отыр.
Дереккөз: Оқу-ағарту министрлігі
