Облыстық мәслихаттың тұрақты комиссия отырысында ауылшаруашылығы, жер қатынастары, ветеринария және экология мәселелері қаралды.
Жиынға облыстық мәслихат төрағасы Гүлнар Тойлыбаева қатысты. Сонымен бірге облыстық мәслихат депутаттары, ауылшаруашылығы, жер қатынастары, кәсіпкерлік және индустриялық-инновациялық даму, мемлекеттік сатып алу басқармалары, «Жетісу» әлеуметтік кәсіпкерлік корпорациясы, «Атамекен» кәсіпкерлер палатасы, аграрлық несие корпорациясының өкілдері шақырылды. Отырыста ауылшаруашылығын қаржылай қолдау мекемелері мен ауылшаруашылығы саласындағы «Ауыл аманаты» бағдарламасының жұмыстары, өзге де сұрақтар пысықталды.
Осы орайда облыстық ауылшаруашылығы басқармасы басшысының орынбасары Бақтияр Шампиков пен өзге де лауазымды тұлғалардың баяндамалары тыңдалды. Белгілі болғандай, бүгінде аграрлық секторды тікелей субсидиялаудан қолжетімді несиелендіруге көшу жұмыстары басталған. Қаржыландыру қазір «Кең дала», Агробизнес», «Іскер» бағдарламалары арқылы іске асырылуда. Көктемгі дала жұмыстарын қаржыландыру үшін «Кең дала-1», «Кең дала-2» бағдарламалары аясында 4 млрд. теңге жеңілдетілген несиелер берілген. Жыл басынан 812 бірлік, оның ішінде лизинг бағдарламалары аясында сатып алынған жаңа техникалар да бар.
«Ауыл Аманаты» бағдарламасы бойынша биыл республикалық бюджеттен 2,8 млрд. теңге қарастырылған, бұл өткен жылмен салыстырғанда біраз төмен. Осы бағдарлама бойынша 408 өтінім қабылданып, 342-сі мақұлданған. «Ірі жобалар» бағдарламасы шеңберінде биыл 7 млрд. теңге бөлінген. Бұл қаражатқа 1200 басқа арналған тауарлы-сүт фермасы және 3291 гектар жерге су үнемдеу технологиясын енгізу бойынша 4 жоба қарастырылуда.
Айта кетейік, қаржыландыру «Кең дала», Агробизнес», «Іскер» бағдарламалары арқылы іске асып жатыр. Жалпы биыл бұл бағытта 11,2 млрд. теңге қарастырылған. Соның ішінде «Кең дала» бағдарламасы – 4,084 млрд. теңге 187 шаруа қожалығына, «Агробизнес» бағдарламасы – 8,23 млрд. теңге 394 шаруа қожалығына, «Іскер» бағдарламасы – 406 млн. теңге 49 кәсіпкерге берілген. Жалпы игерілген қаражат көлемі 11,6 млрд. теңгені құрайды.
Сонымен бірге бағдарлама талаптарына сәйкес келмегендіктен жалпы 2,3 млрд. теңге көлемінде 76 өтініш қайтарылған. Оның басым бөлігі несие тарихының бұзылуы, кепіл зат бойынша заң жүзінде құжаттары толық рәсімделмеген. Ауылшаруашылығы саласын қаржыландыру үшін былтыр 33,8 млрд. теңге бөлініп, игерілген, оның 80,5 пайызы субсидия. Үкімет резервінен 2,6 млрд. теңге, оның 500 млн. теңгесі минералды тыңайтқыштарға, 2,1 млрд. теңге мал шаруашылығын субсидияландыруға қарастырылған. Қант қызылшасы, майлы дақылдар, жүгері дақылдарын субсидиялау үшін республикалық бюджеттен 4,2 млрд. теңге, жергілікті бюджет есебінен 3,7 млрд. теңге төленген.
Сонымен бірге жергілікті бюджет есебінен тұқымды субсидиялауға – 812,4 млн. теңге, пестецидтерге – 460,8 млн. теңге, тыңайтқыштарға – 2,2 млрд. теңге, суармалы су жеткізуге – 17,2 млн. теңге, асыл тұқымды мал шаруашылығына – 6,6 млрд. теңге, инвестициялық субсидиялауға – 3,2 млрд. теңге, несие және лизинг бойынша сыйақы мөлшерлемелерін субсидиялауға – 2,3 млрд. теңге, сүтті қайта өңдеуге – 992,2 млн. теңге, азық-түлік астығын субсидиялауға – 166,2 млн. теңге, басқа да шығындарға – 11,4 млн. теңге төленген. Қомақты қаржылай қолдау нәтижесінде ауылшаруашылығының жалпы өнімі 455,8 млрд. теңгеге жетіп, нақты индекс көлемі – 101,7 пайызды құраған.
Жиын барысында ауылшаруашылығы, соның ішінде субсидия, несие, өнім өткізу, жанар-жағармай мәселелеріне қатысты туындаған сұрақтарға жауап қайтарылып, ой-пікірлер талқыланды. Соңында күн тәртібінде қаралған мәселелер назарға алынып, тиісті қаулылар қабылданды.
Айгүл Байбосынова
