Сирек кездесетін қар барысының тіршілік ету ортасы кеңейіп келеді. Туризм де белсенді даму үстінде. Орман дақылдарын өсіретін питомникте қазір ыстық кезең. 14 сотық жерде орналасқан Сиверс алма көшеттерін өңдеу керек. Өткен жылдың күзінде себілген тұқым көктемде ойдағыдай шыққан. Сондықтан, бұл ағаштар жақында ұлттық табиғи парктің орман қорын толықтырады.
Орман питомнигінің шебері Тимур Әубәкіровтың сөзінше, жыл сайын таулардағы орман дақылдары 25-30 мыңға, қажет болса одан әрі көбейтіліп отырады. Питомник бойынша өнгіштік 80-90 пайызды құрайды. Сиверс алма ағашы құрғақшылыққа төзімді әрі өте жақсы өсім береді.
Жоңғар Алатауы ұлттық табиғи паркінің жалпы ауданы 350 мың гектардан асады. Мұнда өсімдіктердің 2 мыңнан аса түрі бар, олардың 44-і эндемиктер. Тау баурайларында сүтқоректілердің 49 түрі мекендейді. Олардың жартысы Қазақстанның Қызыл кітабына енгізілген. Зоологтар аумақты ерекше қорғаудың арқасында жабайы жануарлар санының жылдан жылға артып келе жатқанын айтты.
– Жануарларды әр көктем сайын санаймыз. Нәтижесінде аюдың көбейгені байқалды. Қазір олардың саны 305-ке жетті. Қар барысының популяциясы ұлғаюда. Олар бұрын өте сирек кездесетін. Қазір осы жерге жерсінген. Саны 30-ға жуық. Қабан, бұғы, арқар, сібір елігі көбеюде, – дейді Жоңғар Алатауы мемлекеттік ұлттық табиғи паркі бөлімінің басшысы Жанарбек Молдахан.
Сирек кездесетін жануарларды есепке алу үшін парк қызметкерлері озық технологияларды пайдаланады. Аң соқпақтарының жанына фототасқыштар орнатылып, барлық бақылау арнайы смарт платформаға енгізіледі. Өткен жылы жануарлар дүниесін қорғау және өртке қарсы күрес үшін Кіші Басқан өзені бойында 3 жаңа көпір орнатылған.
– Бұл жерде жету қиын жерлер бар. Сол себепті көпір керек. Бізде негізінен қарағай, шырша орманы көп. Олар өрт қаупі бар кезеңде оңай тұтанады. Осы 3 көпірдің құрылысына қаражат бөлінді. Құрылысы маусым айында басталады, – дейді Жоңғар Алатауы мемлекеттік ұлттық табиғи паркінің маманы Айдана Тұрыспекова.
Биылғы маусымда Жоңғар Алатауы ұлттық табиғи паркінде 13 туристік бағыт жұмыс істейтін болады. Алакөлден бастап, таулы Жасылкөл көліне дейін қызықты кезең басталады. Осының арқасында қорық аймағында туристер саны артады деп күтіліп отыр.
Айгүл БАЙБОСЫНОВА
