Мемлекет басшысының өкімімен Еркін Валитханұлы Тұқымов Қазақстан Республикасы Президентінің жанындағы Қазақстанның стратегиялық зерттеулер институтының (ҚСЗИ) директоры қызметінен босатылды. Бұл туралы Ақорданың ресми хабарламасында айтылды.
Тағы бір өкіммен аталған институттың жаңа директоры болып Жандос Нұрланұлы Шаймарданов тағайындалды.
Еркін Тұқымов ҚСЗИ-ды 2022 жылғы қаңтардан бастап басқарған.
Жандос Шаймарданов туралы
Жандос Нұрланұлы Шаймарданов 1987 жылы Шығыс Қазақстан облысында дүниеге келген. Ол Ұлыбританиядағы Йорк университетін және Испаниядағы IE университетін тәмамдаған.
Еңбек жолын 2009 жылы ҚР Экономика және жоспарлау министрлігінде бас сарапшы қызметінен бастаған.
Осы уақытқа дейін әртүрлі жауапты қызметтерді атқарған:
-
2010–2013 жж. – «Самұрық-Қазына» ҰӘҚ» АҚ менеджері;
-
2013–2014 жж. – ҚР Экономика және бюджеттік жоспарлау министрлігінде мемлекеттік міндеттемелерді басқару және қаржы секторын дамыту саясаты басқармасының бас сарапшысы;
-
2014–2016 жж. – ҚР Ұлттық экономика министрлігі Стратегиялық жоспарлау және талдау департаментінің директоры;
-
2016–2019 жж. – «Бәйтерек» ҰБХ» АҚ басқарушы директоры;
-
2019–2020 жж. – «QazTech Ventures» АҚ басқарма төрағасы;
-
2020–2022 жж. – ҚР Ұлттық банкі Ақша-несие саясаты департаментінің директоры;
-
2022–2023 жж. – ҚР Стратегиялық жоспарлау және реформалар агенттігінің Ұлттық статистика бюросының басшысы;
-
2023–2025 жж. – ҚР Стратегиялық жоспарлау және реформалар агенттігінің төрағасы.
2025 жылғы мамыр айында Үкімет қаулысымен Ұлттық экономика вице-министрі лауазымына тағайындалған болатын.
ҚСЗИ туралы
Қазақстан Республикасы Президентінің жанындағы Қазақстанның стратегиялық зерттеулер институты – 1993 жылғы 16 маусымда Мемлекет басшысының Жарлығымен құрылған мемлекеттік болжамдық-талдамалық мекеме.
Институттың негізгі міндеті – ішкі және сыртқы саясаттың стратегиялық бағыттары бойынша Президент қызметінің сараптамалық-талдамалық және зерттеушілік қамтамасыз етілуін жүзеге асыру.
