Облыстық мәслихат депутаттарының қатысуымен тексеру комиссиясының кезекті отырысы өтті.
Онда жергілікті бюджетке түсетін салықтар мен бюджетке төленетін басқа да міндетті төлемдердің толық және уақытылы түсу тиімділігіне жүргізілген мемлекеттік аудиттің қорытындылары қаралды. Мемлекеттік аудит «Қазақстан Республикасы Қаржы министрлігінің мемлекеттік кірістер комитеті Жетісу облысы бойынша мемлекеттік кірістер департаментінің Панфилов ауданы бойынша мемлекеттік кірістер басқармасы» республикалық мемлекеттік мекемесінде жүргізіліп, 2023 жылдың қаңтар айы мен 2024 жылдың желтоқсан айы аралығы қаралды.
Жүргізілген аудиторлық іс-шара нәтижесінде 7 964,4 мың теңгеге қаржылық бұзушылықтар анықталып, оның 818,3 мың теңгесі аудандық бюджет есебіне өндірілді. Сонымен бірге 4 рәсімдік бұзушылықтар анықталған. Мемлекеттік кірістер органдарының міндеті бюджетке салықтар мен басқа да міндетті төлемдердің толық және уақытылы түсуін қамтамасыз ету, сондай-ақ, салықтық бақылауды жүзеге асыру. Десе де функционалдық міндеттердің өз деңгейінде іске асырылмағаны туралы фактілер бар.
Жүргізілген мемлекеттік аудит – аудит объектісінің лауазымды тұлғаларының Қазақстан Республикасы Салық және басқа да заңнама талаптарын өз деңгейінде сақтамайтынын көрсетуде. Аудит барысында салық төлеушілердің салық декларацияларын мерзімінде тапсырмағаны немесе жеке табыс салығы мен әлеуметтік салық бойынша нөлдік мәндері бар декларацияларды ұсынғаны анықталған. Осыған байланысты салық төлеушілер өздерінің салықтық міндеттемелерін толық орындамай, салық төлеушілерге әкімшілік ықпал ету шаралары қолданылмаған.
Сонымен бірге салық төлеушілердің мүлік сатудан және мүлікті өткізу кезінде құн өсімінен түсетін табыс алу кезінде салықтық міндеттемелерін орындамағаны белгілі болды.
Салдарынан жеке табыс салығының бюджетке уақытылы төленбеу жағдайы орын алған. Отырыс қорытындысы бойынша тексеру комиссиясының қаулысы қабылданып, аудит объектілеріне тиісті тапсырмалар берілді.
Айгүл БАЙБОСЫНОВА
