Әділет министрі Ерлан Сәрсембаев Қазақстандағы заңгерлік білім беру мәселелері туралы айтты, деп хабарлайды 7-su.kz желілік басылымы Orda.kz сайтына сілтеме жасап.
Министрдің айтуынша, қазіргі қолданыстағы білім беру жүйесі базалық кәсіби білімі жоқ азаматтарға да заңгер дипломын алуға мүмкіндік беріп отыр. Яғни, Қазақстанда бакалавриат пен магистратура бағыттарының өзара байланысы міндетті емес.
«Мысалы, студент төрт жыл бойы техникалық мамандық бойынша білім алады. Кейін бір жылдық құқық магистратурасын оқып, бағытын түбегейлі өзгертіп, заңгер ретінде жұмыс істеу құқығына ие болады. Мұндай маман мемлекеттік қызметке орналасып, заң шығару процесіне тікелей қатыса алады немесе адвокат ретінде азаматтардың құқықтарын сотта қорғай алады», – деді Ерлан Сәрсембаев Сенаттағы парламенттік тыңдауларда сөйлеген сөзінде.
Министрдің пікірінше, бұл жағдай елдегі заңгерлік кадрлардың сапасына тікелей әсер етеді.
«Мұндай жағдай заңгер мамандардың жеткілікті деңгейде дайын болмауына едәуір ықпал етеді», – деп атап өтті министр.
Сонымен қатар, Сәрсембаев заңнамадағы олқылықтарға да назар аударды. Оның айтуынша, қазіргі заңнамада профильдік бакалавриаты жоқ, бірақ құқық магистрі дәрежесін алған түлекті толыққанды заңгер деп есептеуге бола ма, жоқ па – бұл нақты көрсетілмеген.
Министр осы мәселені шешу үшін бакалавриат пен магистратура арасындағы мамандықтық сабақтастықты міндетті ету қажет екенін айтты.
Фото: Freepik.com
