Жаңа Су кодексіне сәйкес су пайдаланушылар ауылшаруашылығы қажеттіліктері үшін 2 миллион текшеметрге дейін еріген қар суын өз бетінше жинай алатын мүмкіндік бар.
Бұл үшін көлемі 2 миллион текшеметрден аспайтын тоған, су қоймасы немесе өзге де қойма салу қажет. Еріген қар суын жинауға арналған гидротехникалық құрылымдар қауіпсіздік талаптарына сай болуы тиіс. Сондай-ақ, өзен, көл, басқа да су нысандарымен байланыспауы және қоршаған ортаға зиян келтірмеуі керек. Құрылыс аяқталғаннан кейін бассейндік су инспекциясын хабардар етіп, бұл нысанды арнайы тізімге енгізу міндет.
Бұл шара диқандарды суармалы сумен қамтамасыз етуді жақсартуға және елдегі ауылшаруашылығының дамуына бағытталған. Жаңа Су кодексіне Мемлекет басшысы биыл 9 сәуірде қол қойған болатын. Құжат 10 маусымда күшіне енеді.
Су саясаты департаментінің директоры Серікжан Бекетаевтің айтуынша, жаңа Су кодексі Қазақ- стандағы су саласының барлық бағытын қамтиды.
Оның басты міндеттерінің бірі – су үнемдеу жөніндегі жалпыұлттық саясатты қалыптастыру және дамыту, елді мекендерді сумен жабдықтау және су бұруды реттеу, жаңбыр және еріген қар сулары, тазартылған ағын сулар, тұщытылған тұзды сулар сияқты балама су көздерін пайдалану. Сонымен бірге су ресурстарын қорғау мен тиімді пайдалану деңгейін арттыру болып табылады.
Айгүл БАЙЖҰМАҚЫЗЫ
