Биыл аудан шаруалары қыстың қамына ерте кірісті. Аудандық ауылшаруашылығы бөлімінің мәліметінше, мал азығын дайындау үшін 313,2 мың тонна жемшөп қажет. 175 тонна табиғи шөп, 10,6 тонна пішендеме, 19,3 тонна сүрлем, 68,2 тонна сабан, 40,1 тонна жем жинау жоспарлануда. Қазір 38,3 мың тонна шөп жиналды.
Бүгінде аудан бойынша шөп шабуға арналған техникалар мен құрал-жабдықтар жеткілікті. Бірқатар шаруа қожалығы шөпті рулондап, престеп сақтауда. Бұл – әрі үнемді, әрі сақтау мен тасымалдауға қолайлы әдіс.
Ауыл тұрғындары үшін шөп шабу – жай ғана маусымдық жұмыс емес, қыстан қысылмай шығудың басты кепілі. Әсіресе, мал басы көп Кербұлақ секілді аудандарда бұл науқанның маңызы зор. Табиғи шөп – малға ең пайдалы, дәруменге бай азық көзі. Сонымен қатар пішендеме мен сүрлем де ірі қара мен қой-ешкі үшін тиімді қорек ретінде дайындалып отыр. Аудан бойынша жем дайындау жұмыстары кезек күттірмейтін өзекті мәселе. «Қыстың қамын жазда ойла» деген. Қалай болғанда да берекелі жаздың қолайлы кездерін тиімді пайдаланып қалғанымыз жөн.
Раушан БИСЕМБЕКОВА
