Қала әкімдігі мен ұлттық спорт қауымдастығы және жергілікті атбегілер бірлесіп ұйымдастырған дүбірлі додаға еліміздің әр аймағынан 200-ден астам сайгүлік қатысты. Олар 5 шақырымдық «Ұшқыр», 7 шақырымға «Құнан», 18 шақырымға «Аламан» бәйге сынды үш кезеңде бақ сынап, нағыз жүлделі жүйріктер анықталды.
Жиналған қауымды ұлтымыздың ұлық мерекесі Құрбан айтпен құттықтаған Талдықорған қаласының әкімі Ернат Бәзіл шабандоздарға сәттілік тілеп, көпшілікке ізгі тілегін жеткізді. Сонымен бірге шаһар басшысы аймақта ұлттық спорт түрлерінің жылдан жылға дамып келе жатқанын тілге тиек етіп, бұл салаға қолдау әр қашан жалғаса беретінін атап өтті.
– Ұлттық спорт түрлерін кеңінен дәріптеп, бабалар мұрасын ұлықтайтын бұл жарыстың қашан да орны бөлек. Бір қуантарлығы қазір жастар арасында ат спортына қызығушылық жылдан жылға артып келе жатыр. Біз ұлттық салт-дәстүрді жаңғыртып, рухты көтеретін мұндай жарыстарды қолдауға әр кезде дайынбыз. Шабандоздар барлықтарыңызға сәттілік, тек жеңіс тілеймін,– деді Ернат Дүйсенбекұлы.
Сонымен көрермен қауымның делебесін қоздырып, тартымды да тамамаша өткен бәйге алаңында нағыз шашасына шаң жұқтырмай қара үзіп шыққан тұлпар иелері марапатталды.
Жарыс қорытындысы бойынша жеті шақырымдық құнан жарысында топ жарып, І орынды Шығыс Қазақстан облысы Зайсаң қаласының Санжар есімді шабандозы еншілесе, «Ұшқыр» бәйге кезеңінде І орынды Астана қаласынан келген Ерасыл жеңіп алды. Ал «Аламан бәйгеде» бірінші орынды тұлпары жалғыз қара болып келген Жетісу облысының әйгілі шабандозы Амангелді Хамза қанжығалады.
Айдын КӘЛІМХАН
