Талдықорғанда қоғамдық қорлардың бірінде лицензиясыз діни білім беру дерегі анықталды. Сонымен қатар қор ғимаратында тіркеусіз тұрған сегіз адам әкімшілік жауапкершілікке тартылды, – деп хабарлайды 7-su.kz ақпараттық порталы.
Прокуратураның мәліметінше, заңбұзушылықтар діни қызмет туралы заңнаманың сақталуын тексеру барысында белгілі болған. Тексеру кезінде қордың тиісті лицензиясыз діни білім бергені анықталған.
Бұдан бөлек, ғимаратта тұрғылықты жері немесе уақытша болатын орны бойынша тіркелмеген сегіз адам тұрған. Олардың барлығына қатысты әкімшілік шаралар қолданылған.
Прокуратура қорды лицензиясынан айыру туралы талап-арызбен сотқа жүгінген. Қор өкілі талаппен келісіп, сот талап-арызды толық қанағаттандырған. Алайда сот шешімі әзірге заңды күшіне енген жоқ.
Айта кетейік, бұған дейін Оқу-ағарту министрі Жұлдыз Сүлейменова жекеменшік мектептерде оқушы қыздардың хиджаб киюіне рұқсат берілген жағдайда, білім беру ұйымдары лицензиясынан айырылуы мүмкін екенін мәлімдеген болатын.
Қазақстан мектептерінде діни киім киюге 2016 жылдан бері тыйым салынған. Дегенмен бұл талаптың орындалуына қатысты мәселелер әлі де талқыланып келеді.
