Талдықорған қаласында Рақышев пен Уәлиханов көшелерінің қиылысында орын алған жол-көлік оқиғасынан кейін жергілікті билік тұрғындардың қауіпсіздігін арттыру мақсатында бірқатар шұғыл шараларды қолға алды.
Атап айтқанда, апат тіркелген аймақта үш жерге бейнебақылау камералары орнатылып, жүргізушілерге жылдамдықты шектеу үшін 40 км/сағаттық жаңа жол белгісі қойылды.
Еске салсақ, 2025 жылдың 21 сәуірінде Toyota Land Cruiser Prado мен Toyota Camry көліктері соқтығысқан еді. Бұл – осы қиылыста тіркелген алғашқы апат емес. Бұған дейін де бұл аймақта жаяу жүргіншіні қағып кету салдарынан адам өлімімен аяқталған оқиға орын алған болатын.
Тақырыпқа орай: Талдықорғанда тағы да адам шошырлық жол апаты болды
Қауіпсіздік мақсатында бұған дейін орнатылған жасанды кедергілер мен жол белгілеріне қарамастан, кейбір жүргізушілердің жол ережелерін елемеуі тағы бір қайғылы жағдайға себеп болды. Осыған орай, қала әкімдігі мен жергілікті полиция департаменті бұл учаскеге қосымша бақылау орнату туралы шешім қабылдады.
Жаңа орнатылған бейнебақылау камералары жол ережесін бұзу фактілерін тіркеп, автоматты түрде айыппұл салуға мүмкіндік береді. Ал 40 км/сағат жылдамдық шектеуі көлік қозғалысын баяулатып, апаттың алдын алуға бағытталған.
Жергілікті тұрғындар бұл өзгерістерді құптап отыр. Олар қауіпсіздіктің күшейтілуі балалар мен жаяу жүргіншілер үшін өте маңызды екенін айтады. Қала билігі алдағы уақытта басқа да қауіпті аймақтарды анықтап, жол инфрақұрылымын жақсарту жұмыстарын жалғастырмақ.
Мәулен Әнербай
