Сала басшыларының сөзінше, өткен жылыту маусымында Талдықорған қаласы бойынша 700-ден астам көпқабатты тұрғын үйлер мен 210 әлеуметтік маңызы бар нысан және мыңдаған жеке үйлер жылумен қамтылған. Аталған маусымның кедергісіз өтуі жылу жүйелеріне дер кезінде жоспарлы жөндеу жұмыстары жүргізіліп, күтіп ұстаулардың нәтижесі. Ал қазіргі уақытта шаһарда 2025–2026 жылғы жылыту маусымына дайындық жалғасуда. Онда жылу қазандықтарын жөндеу, инженерлік инфрақұрылымды жаңарту және тұрғын үйлерді алдағы қысқа дайындау шаралары қолға алынған. Бүгінде бұл жұмыстардың сапалы әрі уақтылы орындалуы қала әкімінің қатаң бақылауында.
Жиын барысында қала әкімі Ернат Бәзіл аталған маусымның тұрақты әрі апатсыз өтуіне сала мамандарының қосқан үлесі зор екенін айрықша атап өтті. Соның ішінде аймақ тұрғындарының жайлы өмір сүруі жолында қақаған қыстың аязында қарамастан тәулік бойы тынымсыз еңбек еткен қарапайым жұмысшылардың еңбегін ерекше бағалады.
– Жылыту маусымы қала өміріндегі аса маңызды кезең. Осы уақыт ішінде сіздер барлық сынақтарға төтеп беріп, жүйелі жұмыс жасап, тұрғындарды үздіксіз жылумен қамтамасыз еттіңіздер. Міне, бұл –кәсіби біліктілік пен жоғары жауапкершіліктің айқын айғағы. Сіздерге халықтың алғыстан басқа айтары жоқ. Мен сіздерге тек жақсылық, жанұяларыңызға шаттық тілейміз,– деді шаһар басшысы.
Осыдан соң Ернат Дүйсенбекұлы бірқатар коммуналдық сала қызметкерлері мен қаланы жылумен қамтамасыз ету ұйымдарының жұмысшыларын арнайы Алғыс хаттармен марапаттады.
Еске сала кетсек, бүгінде Талдықорған қаласын жылумен және ыстық сумен қамтып отырған 10 қазандық бар. Ең үлкен «Басқуат» жылу қазандығының жүктемесін азайту үшін қосымша қаладағы «Оңтүстік-Батыс» тұрғын ауданында тағы бір кварталдық қазандық салынуда. Сонымен қатар аймақтағы жылу құбырлары өткен ғасырдың 80-90-шы жылдары салынып әбден ескіргендіктен қала көшелеріндегі жылу желілерін қайта жаңарту жұмыстары жоспарға сай жыл сайын жалғасуда.
Айдын КӘЛІМХАН
