Жиынға қалалық бөлімдердің басшылары мен коммуналдық қызмет мекемелерінің өкілдері қатысты. Кездесу барысында жауаптылар ауыз су, жылу, жарық және газ желілерін жүргізу жөнінде баяндама жасап, түйткілді түйіндерді шешудің тиімді жолдарын талқылады. Жиын соңында сала басшыларына барлық желілердегі жөндеу жұмыстарын 1 тамызға дейін аяқтау тапсырылды. Сонымен қатар білім, денсаулық сақтау және әлеуметтік нысандардың қысқа дайындық құжаттарын 1 қыркүйекке дейін алу міндеті жүктелді.
Аталған сала басшыларының сөзінше, бүгінде Талдықорған қаласының әкімі Ернат Бәзілдің тапсырмасына сай шаһарда жылу жүйелерін жаңғырту жұмыстары кезең-кезеңімен қолға алынуда. Қазір қаланы жылумен және ыстық сумен қамтып отырған 10 қазандық жұмыс ітеуде. Осыған байлансты ең үлкен «Басқуат» жылу қазандығының жүктемесін азайту үшін қосымша аймақтағы «Оңтүстік-Батыс» тұрғын ауданында тағы бір кварталдық қазандық салынуда. Бүгінде ондағы құрылыс жұмыстары аяқталуға жақын. Мұндай атқарылып жатқан жобалардың барлығы алдағы уақытта қаланы үздіксіз жылумен қамтуға мол мүмкіндік береді.
Еске сала кетсек, Талдықорған қаласы аумағындағы жылу құбырлары өткен ғасырдың 80-90-шы жылдары салынған. Осыған сәйкес, аймақтағы жылу желілерін қайта жаңарту жұмыстары жыл сайын жалғасуда. Мәселен, 2023 жылы шаһардағы Гагарин, Алдабергенов, Қаблиса жырау, Жансүгіров және Қабанбай батыр көшелеріндегі 5 жарым шақырым жердегі жылу құбыры тегіс ауыстырылса, былтыр Абай, Дарабоз ана, Қабанбай батыр мен Балпық би көшелеріндегі 1,8 шақырым аумақтағы құбыр желісі жаңартылған. Ал биыл мұндай жұмыстар тағы да жалғасын тауып, Жансүгіров көшесіндегі жалпы ұзындығы 3,4 шақырым, кеңдігі 700м магистралды жылу желісін жаңғырту жобасы қолға алынбақ.
Айдын КӘЛІМХАН
